ប្រទេសកូរ៉េខាងត្បូង តែងតែមានកង្វល់ជាយូរមកហើយជុំវិញការលួចបង្កប់កាមេរ៉ាតាមបន្ទប់ទឹកសាធារណៈ ស្ថានីយរថភ្លើងក្រោមដី ឬតាមបន្ទប់ម៉ូតែលនានា ប៉ុន្តែក្ដីបារម្ភ និង ភាពភ័យខ្លាចកាន់តែកើនឡើងមួយកម្រិតទៀត នៅពេលរកឃើញថា សូម្បីតែកាមេរ៉ាដាក់ក្នុងផ្ទះខ្លួនឯង ឥលូវក៏លែងមានសុវត្ថិភាពដែរ។
ជាក់ស្ដែង កាលពីថ្ងៃទី ០១ ខែធ្នូ ឆ្នាំ ២០២៥ កន្លងទៅ តាមការបញ្ជាក់ពីទីភ្នាក់ងារប៉ូលិសក្នុងប្រទេសកូរ៉េខាងត្បូងបានឱ្យដឹងថា ប៉ូលិសចាប់ឃាត់ខ្លួនមនុស្សចំនួន ៤ នាក់ ពាក់ព័ន្ធនឹងករណីលួច hacked ចូលកាមេរ៉ាសុវត្ថិភាពតាមផ្ទះចំនួន ១២ ម៉ឺនគ្រឿង ដើម្បីយករូបភាព និង វីដេអូមិនសមរម្យដាក់លក់ខុសច្បាប់។
ប៉ូលិសបានឱ្យដឹងទៀតថា វីដេអូដែល hacked បានគឺយកចេញកាមេរ៉ាតាមផ្ទះ តាមអគារធ្វើការ មន្ទីរពេទ្យ កន្លែងសូណា និង ទីតាំងមួយចំនួនទៀតដែលប្រើប្រាស់ដើម្បីតាមដានមើលសត្វចិញ្ចឹម ឬកូនៗ។ ក្នុងចំណោមជនខិលខូចទាំង ៤ នាក់នោះ មានម្នាក់រកប្រាក់បានប្រមាណ ១២ ម៉ឺនដុល្លារ ពីការលក់វីដេអូទាំងនោះទៅឱ្យវិបសាយបរទេសដែលចែកចាយមាតិកាខុសច្បាប់ ខណៈម្នាក់ទៀតរកលុយបានច្រើនជាងនេះទ្វេដង។
ប៉ូលិសបានបញ្ជាក់ទៀតថា hackers ទាំងនោះគឺមិនធ្វើការជាមួយគ្នាឡើយ ដោយពួកគេអាចលួចចូលឧបករណ៍ទាំងនោះបានដោយងាយ ព្រោះតែពួកគេប្រើប្រាស់លេខសម្ងាត់មិនរឹងមាំដូចជាការប្រើប្រាស់តួអក្សរដដែលៗ ឬលេខរៀងតគ្នាជាដើម។ ដូចដែលមនុស្សមួយចំនួនបានដឹងហើយថា កាមេរ៉ាដាក់តាមផ្ទះទាំងនោះគឺប្រើប្រាស់ពាសពេញពិភពលោក ហើយភាគច្រើនគឺមានលេខសម្ងាត់មិនរឹងមាំនោះឡើយ ជាហេតុធ្វើឱ្យជនខិលខូចអាចលួចចូលបានយ៉ាងងាយស្រួល៕
ប្រភព៖ Nytimes
