យ៉ាងហោចណាស់ កុមារចំនួន ៧ នាក់នៅរដ្ឋ Madhya Pradesh ប្រទេសឥណ្ឌា បានបាត់បង់ជីវិត និង ច្រើននាក់ផ្សេងទៀតត្រូវសង្គ្រោះនៅមន្ទីរពេទ្យ ក្រោយសង្ស័យថាបានពុលថ្នាំស៊ីរ៉ូក្អក។
តាមការឱ្យដឹង ជនរងគ្រោះចុងក្រោយគេជាក្មេងប្រុសអាយុ ៤ ឆ្នាំ ឈ្មោះ Vikas Yaduvanshi ជាអ្នកក្រុង Chhindwara បានបាត់បង់ជីវិតកាលពីសប្ដាហ៍មុន ដោយសារតែខូចក្រលៀនធ្ងន់ធ្ងរ។ មុនករណីនេះ ក៏មានក្មេងៗមួយចំនួនផ្សេងទៀតកើតមានអាការស្រដៀងគ្នាដែរ ក្រោយផឹកថ្នាំស៊ីរ៉ូក្អករួច។ ជាក់ស្ដែង តាមការបញ្ជាក់របស់លោកវេជ្ជបណ្ឌិត Deepak Patel អ្នកជំនាញព្យាបាលកុមារប្រចាំមន្ទីរពេទ្យស្រុក Chhindwara បានឱ្យដឹងថា ក្មេងៗរងគ្រោះដែលបានបាត់បង់ជីវិតគឺមានអាយុចន្លោះពី ១ ទៅ ៧ ឆ្នាំ ដោយករណីសង្ស័យដំបូងត្រូវបានរាយការណ៍នៅថ្ងៃទី ២៤ ខែសីហា ឆ្នាំ ២០២៥ កន្លងទៅ និង ករណីស្លាប់ដំបូងគេបានកើតឡើងនៅថ្ងៃទី ០៧ ខែកញ្ញា ឆ្នាំ ២០២៥។
តាមការលើកឡើងពីក្រុមគ្រួសារសាច់ញាតិ ក្មេងៗដំបូងឡើយមានអាការផ្ដាសាយស្រួចស្រាវ ហើយក៏បានឱ្យថ្នាំស៊ីរ៉ូក្អកផឹក។ យ៉ាងណាមិញ ប៉ុន្មានថ្ងៃក្រោយមក ពួកគេក៏ស្រាប់តែលែងនោម ហើយក៏ទៅជាខូចក្រលៀនធ្ងន់ធ្ងរ ធ្លាក់ខ្លួនទៅជាឈឺធ្ងន់។ លទ្ធផលតេស្តបានបង្ហាញថាមានសារធាតុគីមីមួយក្នុងថ្នាំស៊ីរ៉ូក្អកហៅថា diethylene glycol ដែលជាសារធាតុគីមីពុលដូចនឹងករណីស្លាប់ដោយថ្នាំស៊ីរ៉ូជាង ៣០០ ករណីកើតមាននៅ Gambia, ឥណ្ឌូនេស៊ី និង Uzbekistan។ សារធាតុមួយនេះ ជាញឹកញាប់ត្រូវបានក្រុមហ៊ុនឱសថមួយចំនួនប្រើប្រាស់ដោយខុសច្បាប់ ដើម្បីជំនួសសារធាតុដែលមានសុវត្ថិភាព ព្រោះតែវាមានតម្លៃធូរថ្លៃជាង។
ជាការឆ្លើយតបនឹងករណីដែលបានកើតឡើងនេះ ខាងអាជ្ញាធរផ្នែកសុខាភិបាលនៅប្រទេសឥណ្ឌា ក៏បានចេញការហាមប្រាមលើការចែកចាយលក់ស៊ីរ៉ូក្អកម៉ាក Coldrif និង Nextro-DS ហើយក៏បានប្រមូលយកសំណាកតាមផ្ទះដែលមាប្រើប្រាស់ដើម្បីយកមកស៊ើបអង្កេត។ ជាមួយគ្នានោះ អាជ្ញាធរក្នុងតំបន់ក៏បានណែនាំឱ្យឪពុកម្ដាយទាំងអស់កុំឱ្យកូនផឹកថ្នាំស៊ីរ៉ូដែលគ្មានប្រភពតាមតែចិត្តខ្លួនឯង ឬទៅជ្រើសរើសថ្នាំបុរាណអ្វីជាដើម ដោយគួរតែនាំកូនៗទៅប្រឹក្សាជាមួយគ្រូពេទ្យជំនាញ៕
ប្រភព៖ Kenh14
