ចូលប្រកួតកម្មវិធីសម្រស់ បេក្ខភាពម្នាក់ៗសុទ្ធតែមានគោលដៅតែមួយ គឺក្លាយជាម្ចាស់មកុដនៃកម្មវិធី។ យ៉ាងណាមិញ បើមិនជាប់មកុដ បេក្ខភាពអាចប្រកាន់ខ្ជាប់ធ្វើរឿង ៥ យ៉ាងនេះ ដែលធានាថាអាចរក្សាបានតម្លៃខ្ពស់ មានផ្លូរដើរវែងឆ្ងាយ អ្នកគាំទ្រស្រលាញ់ចូលចិត្ត ថាមិនត្រូវមានប្រជាប្រិយភាពជាងម្ចាស់មកុដទៅទៀត។
១. កុំរិះគន់កម្មវិធី ឬ គណៈកម្មការ
ជៀសវាងលើកឡើងថា កម្មវិធីឬគណៈកម្មការមិនស្មើភាពឬលម្អៀង មិនថាជាការនិយាយឬសរសេរបង្ហោះនៅលើបណ្តាញសង្គម។ សូម្បីតែការផ្តល់បទសម្ភាសក៏មិនគួរលើកឡើងពីចំណុចនេះដែរ។ ជំនួសមកវិញ បេក្ខភាពអាចនិយាយលើកពីការគោរពចំពោះការដាក់ពិន្ទុរបស់គណៈកម្មការ ឬនិយាយអបអរសាទរចំពោះអ្នកឈ្នះ។
២. កុំបង្ហាការមិនពេញចិត្តចំពោះម្ចាស់មកុដ
«នាងមិនសមជាម្ចាស់មកុដ» ដាច់ខាតមិនគួរនិយាយសោះឡើយ។ ធាតុពិតការនិយាយបែបនេះ វាជាការឆ្លុះបញ្ចាំងពីខ្លួនឯងវិញ ទាំងអត្តចរិត និង បន្ទាបតម្លៃខ្លួនឯង។ បេក្ខភាពអាចជំនួសមកនិយាយថា «គាត់ពិតជាខិតខំប្រឹងប្រែងដើម្បីវា អីចឹង គាត់ស័ក្តិសមហើយ!»។
៣. កុំបន្ទោសកម្មវិធីប្រកួតគ្មានអ្វីអស្ចារ្យ
កាលណានិយាយពាក្យនេះ វានឹងបំផ្លាញអនាគត ក៏ដូចជាបិទផ្លូវសម្រាប់ដើរលើអាជីពមួយនេះ។ អាចជំនួសមកវិញ «ខ្ញុំអរគុណសម្រាប់វេទិកាមួយនេះ ដែលបានផ្តល់មេរៀនឱ្យខ្ញុំយ៉ាងច្រើន ខ្ញុំចូលចិត្តវេទិកាមួយនេះ»។
៤. កុំរិះគន់បេក្ខភាពដទៃ
មុនរិះគន់គេ គប្បីសម្គាល់មើលខ្លួនឯងសិន ពីព្រោះមនុស្សម្នាក់ៗ មានភាពខ្លាំង ពូកែ និង ទេពកោសល្យ ដោយឡែកពីគ្នា។ ការរិះគន់នឹងបង្ហាញពីភាពច្រណែន។ អាចជំនួសមកវិញ ជាការនិយាយសរសើរពីសមត្ថភាព និង ទេពកោសល្យរបស់ពួកគេនៅក្នុងកម្មវិធី។
៥. កុំរិះគន់ខ្លួនឯងជាសាធារណៈ
មិនថាខ្វះខាតចំណុចណា មិនត្រូវបង្ហាញអារម្មណ៍អវិជ្ជមានឬមិនពេញចិត្តចំពោះខ្លួនឯងឡើយ។ គប្បីទទួលយកខ្លួនឯង ហើយរៀនពីចំណុចខ្វះខាតដើម្បីអភិវឌ្ឍន៍ខ្លួន។ បេក្ខភាពអាចនិយាយថា «ខ្ញុំបានប្រឹងប្រែងអស់ពីសមត្ថភាពហើយ ទោះមិនជាប់ជ័យលាភី ខ្ញុំក៏មានមោទកភាពចំពោះខ្លួនឯង ហើយខ្ញុំនឹងអភិវឌ្ឍន៍ខ្លួនឱ្យរីកចម្រើនបន្ថែមទៀត»៕
