បុរសខ្លះរៀបការមានប្រពន្ធកូនទៅហើយ តែនៅតែឱ្យម្តាយចូលមកចាត់ចែង ចូលមកចេះដឹង និង ជាចំណែកគ្រប់យ៉ាងនៃគ្រួសាររបស់ខ្លួន។ ករណីនេះប្តីប្រពន្ធមិនតិចទេ ដែលមានបញ្ហាចម្រូងចម្រាស ខ្លះរហូតឈានដល់ការលែងលះទៀតផង។ យើងសូមលើកពីប្តី ៣ ប្រភេទ ដែលពួកគេស្តាប់តែតាមម្តាយ ភ្លេចគិតប្រពន្ធកូនខ្លួនឯង។
១. ប្តីជាកូនក្មេងមិនចេះធំ
ប្តីប្រភេទនេះពឹងផ្អែកការសម្រេចចិត្តគ្រប់យ៉ាងពីម្តាយ រាប់តាំងពីការជ្រើសរើសប្រពន្ធ រហូតដល់ដោះស្រាយបញ្ហាក្នុងគ្រួសារ។ ជាក់ស្តែង មុនពេលបង្កើតការសម្រេចចិត្តអ្វីមួយ គេប្រឹក្សាតែជាមួយម្តាយគេប៉ុណ្ណោះ សូម្បីតែរឿងពាក់ព័ន្ធនឹងប្រពន្ធកូន ក៏គេឱ្យម្តាយគេជាអ្នកសម្រេចចិត្តផងដែរ។ មានប្តីបែបនេះ ប្រពន្ធនឹងមានអារម្មណ៍គំនិតរបស់នាង គឺជាជម្រើសទីពីរ ខណៈដែលនាងជាគូជីវិតរួមរស់ជាមួយគ្នារាល់ថ្ងៃ។ អាចថាប្តីបែបនេះ ខ្វះទំនួលខុសត្រូវ និង ជាដៃគូជីវិតដែលគ្មានភាពឯករាជ្យ។
២. ប្តីមិនចេះកំណត់ព្រំដែន
ប្តីប្រពន្ធទូទៅ តែងកំណត់គ្នារឿងណាគួរ និង មិនគួរចែករំលែក។ តែសម្រាប់ប្តីប្រភេទនេះវិញ អនុញ្ញាតឱ្យម្តាយដឹងឮរឿងគ្រប់យ៉ាង ព្រមទាំងឱ្យចូលមកចាត់ចែងសព្វគ្រប់ក្នុងគ្រួសារ។ ឧទាហរណ៍ ម្តាយចាត់ចែងតាំងពីរបៀបរស់នៅ, គម្រោងថ្ងៃសម្រាក ឬការចំណាយលុយរបស់គ្រួសារ…ដើម។ សកម្មភាពបែបនេះ គឺជាការបំផ្លាញការរួបរួមរបស់ប្តីប្រពន្ធ។ ប្រពន្ធនឹងមានអារម្មណ៍ត្រូវបានបំពាន ទាំងភាពផ្ទាល់ខ្លួន និង សិទ្ធិក្នុងនាមជាប្រពន្ធ។ ពីមួយថ្ងៃទៅមួយថ្ងៃ វានឹងបង្កើនតានតឹង ហើយបាត់បង់ភាពស្និទ្ធស្នាល។
៣. ប្តីអាងម្តាយជាអ្នកការពារ
ជម្លោះប្តីប្រពន្ធជារឿងរវាងមនុស្សពីរនាក់ ប៉ុន្តែប្តីម្នាក់នេះចូលចិត្តយកម្តាយមកធ្វើជាអ្នកការពារ និង យកឈ្នះតែឯង ដោយមិនថ្លឹងថ្លែងដើម្បីសម្រួលឡើយ។ ប្រពន្ធនឹងមានអារម្មណ៍មិនទទួលបានការគាំទ្រ និង មិនគោរពឱ្យតម្លៃនាង។ វាបង្កជាករណីកង្វះភាពជាដៃគូ បំផ្លាញដល់ការជឿជាក់ និង ក្តីស្រលាញ់៕
