បើកំពុងធុញថប់ មានសម្ពាធផ្លូវចិត្ត អនុវត្ត ៣ ចំណុចនេះតាម ហ្វីយ៉ាតា ជីវិតនឹងមានរស្មី មានជីវិតជីវ៉ាឡើងវិញ

បោះជំហានមកដល់ចំណុចនេះ ហ្វីយ៉ាតា ​នាងតែងចែករំលែកនូវអ្វីដែលជាចំណេះដឹង ក៏ដូចជាបទពិសោធ ដែលមានប្រយោជន៍សម្រាប់មហាជន។ ជាក់ស្តែងដូចថ្មីៗនេះ តាមរយៈសំណួរមួយយ៉ាងខ្លីពី ដុកទ័រ Tong នាងបានឆ្លើយយ៉ាងក្បោះក្បាយ ដែលជាកម្លាំងជំរុញចិត្តមួយដល់អ្នកដែលកំពុងថប់បារម្ភ ឬ មានសម្ពោធផ្លូវចិត្តផងដែរ។

ដុកទ័រ Tong ​បានសួរថា «តើធ្វើម៉េចឱ្យជីវិតសប្បាយចិត្ត?»។ ចែករំលែកខ្លីៗងាយយល់ ហ្វីយ៉ាតា បានលើកឡើង ៣ ចំណុចដូចខាងក្រោម៖

«១. ត្រូវរៀនទទួលស្គាល់ខ្លួនឯង ហើយស្រលាញ់ខ្លួនឯងឱ្យបានសិន: ព្រោះការដែលយើងចេះស្រលាញ់ខ្លួនឯងសិន ទើបយើងអាចបើកទទួលក្តីស្រលាញ់ពីអ្នកដទៃ ហើយយើងអាចបង្រៀនគេថា ត្រូវស្រលាញ់យើងយ៉ាងម៉េចឱ្យត្រឹមត្រូវ។ កាលណាមនុស្សជុំវិញខ្លួនយើង មិនថាមិត្តភក្តិ ឬ ដៃគូស្នេហាស្រលាញ់យើងត្រឹមត្រូវហើយ ជីវិតយើងនឹងងាយស្រួលជាងមុន។

២. កុំសូវស្តាប់សម្តីអវិជ្ជមានពីអ្នកដទៃច្រើនពេក: ព្រោះកាលណាយើងយកខួរក្បាល និង ចិត្តយើងទៅស្តាប់ពីពាក្យដែលអត់ល្អ ពាក្យប៉ះពាល់អារម្មណ៍ច្រើនពេក យើងនឹងអត់មានពេលយកទៅគិតលើរឿងល្អៗអភិវឌ្ឍន៍ខ្លួនឯង ក៏ដូចជាជួយសង្គមជាតិ។

៣. ធ្វើអ្វីដែលខ្លួនឯងស្រលាញ់គឺសំខាន់បំផុត: ខ្ញុំឃើញថាបងប្អូនខ្លះគាត់ទ្រាំធ្វើការនៅកន្លែងដែលមិនផ្តល់តម្លៃឱ្យគាត់  វាគឺជាសម្ពាធជីវិតមួយដ៏ធំ ដោយសាររាល់ថ្ងៃយើងត្រូវតស៊ូជាមួយជីវិតស្រាប់ទៅហើយ។ អីចឹង! កាលណាយើងទៅធ្វើការ ហើយធ្វើនូវអ្វីដែលបង្ខំខ្លួនឯងឱ្យធ្វើទៀត វាប៉ះពាល់ដល់ផ្លូវចិត្ត ហើយធ្វើវាក៏មិនបានចេញពីបេះដូងដែរ។ ដូច្នេះ ធ្វើអ្វីដែលខ្លួនស្រលាញ់ ស្រលាញ់ខ្លួនឯង និង កុំស្តាប់គំនិតអវិជ្ជមានអ្នកដទៃច្រើនពេក»៕​

ប្រភព៖ FB