កាលពីថ្ងៃទី ២ ខែឧសភា ឆ្នាំ ២០២៥ កន្លងទៅ សារព័ត៌មាន បានរាយការណ៍ពីករណីមួយ ដែលសិស្សសាលានៅប្រទេសឥណ្ឌាជាង ១០០ នាក់បានធ្លាក់ខ្លួនឈឺ ក្រោយពីបរិភោគអាហារថ្ងៃត្រង់នៅសាលា ដែលមានពស់មួយក្បាលងាប់នៅក្នុងម្ហូប។
ហេតុការណ៍នេះបានកើតឡើងនៅក្នុងទីក្រុង Mokama រដ្ឋ Bihar ភាគខាងកើត ដោយព័ត៌មានបានឱ្យដឹងថា ចុងភៅបានប្រទះឃើញពស់មួយក្បាលងាប់នៅក្នុងម្ហូប ហើយក៏បានយកវាចេញ ព្រមទាំងបន្តចែកអាហារនោះទៅដល់សិស្ស ដែលក្នុងនោះគេជឿថាមានសិស្សចំនួន ៥០០ នាក់បានបរិភោគអាហារនេះ។
យ៉ាងណាមិញ ករណីនេះត្រូវបានគណៈកម្មាធិការសិទ្ធិមនុស្សជាតិ NHRC បានចេញមុខអំពាវនាវឱ្យមានការស៊ើបអង្កេតឱ្យបានហ្មត់ចត់ក្នុងរយៈពេលពីរសប្តាហ៍ រួមទាំងការតាមដានស្ថានភាពរបស់សិស្សដែលរងផលប៉ះពាល់ផងដែរ។ ដោយឡែក ករណីចំណីអាហារខ្វះអនាម័យនេះ ធ្លាប់បានកើតឡើងម្តងមកហើយកាលពីឆ្នាំ ២០១៣ កន្លងទៅក្នុង រដ្ឋ Bihar ដែលកាលនោះបានឆក់យកជីវិតសិស្សសាលាអស់ ២៣ នាក់ឯណោះ៕
ប្រភព៖ Khaosod
