មានករណីដ៏ហួសចិត្តបានកើតឡើងនៅប្រទេសថៃ ដោយមានឆ្កែមួយក្បាលបានពាំគ្រាប់បែកនៅតាមផ្លូវយកឱ្យម្ចាស់ដល់ក្នុងផ្ទះ ធ្វើឱ្យម្ចាស់ស្លន់ស្លោលាយឡំនឹងការហួសចិត្ត។
ហេតុការណ៍បានកើតឡើងនៅថ្ងៃទី ២ ខែមករា ឆ្នាំ ២០២៥ កន្លងទៅនេះ ដោយបុរសជាម្ចាស់ផ្ទះវ័យ ៣៤ ឆ្នាំមានមុខរបរជាទាហានបានរៀបរាប់ឱ្យដឹងថា នៅថ្ងៃកើតហេតុកូនប្រុសរបស់លោក ដែលមានវ័យ ៤ ឆ្នាំបានកាន់យករបស់អ្វីម្យ៉ាងមកឱ្យលោកមើល។ ពេលនោះលោកមើលទៅក៏ថាជាគ្រាប់បែកកែច្នៃ ក៏មានការស្លន់ស្លោជាខ្លាំង ទើបបានយកវាទៅដាក់នៅក្នុងប្រអប់ខ្សាច់ និង ព្យាយាមការពារមិនឱ្យមានការប៉ះទង្គិចណាមួយឡើយ រួចហើយទើបបានខលហៅខាងអាជ្ញាធរពាក់ព័ន្ធឱ្យជួយមកយកទៅកម្ទេចចោល។
ដោយឡែក ក្រោយមកក៏បានសួរទៅកូនប្រុសថាបានរបស់នេះមកពីណា គេក៏បានឆ្លើយប្រាប់ថា ឆ្កែចិញ្ចឹមរបស់ពួកគេជាអ្នកពាំពីខាងក្រៅមក។ ជាក់ស្តែងវាជាឆ្កែដែលចូលចិត្តលេងបាល់ និង របស់ដែលមានរាងមូល ហើយវាក៏តែងតែពាំរបស់ប្លែកៗចូលមកក្នុងផ្ទះជាប្រចាំ។
ដោយឡែក គ្រាប់បែកនេះវិញ ជាគ្រាប់បែកកែច្នៃទំនងជាពួកក្មេងបាននាំគ្នាលេង តែដោយសារតែខ្លាចប៉ូលិសឃើញក៏បានទុកចោលនៅតាមផ្លូវ ទើបឆ្កែជើងល្អក៏បានពាំយកមក។ គ្រាប់បែកនេះមិនផ្ទុះខ្លាំងដូចជាគ្រាប់បែកទូទៅឡើយ តែវាក៏អាចបង្កឱ្យមានការបាត់បង់ជីវិតបានដូចគ្នា៕
ប្រភព៖ AMARINTV
