ជឿជាក់ថា កន្លងមកប្រិយមិត្តប្រាកដជាធ្លាប់បានឃើញ និង ស្គាល់ ឧកញ៉ា តាន់ មុនីវណ្ណ តាមរយៈវីដេអូលើបណ្តាញសង្គម និង តាមវេទិកាចែករំលែកនានា មិនថាចែករំលែកអំពីភាពជាសហគ្រិន បញ្ហាសង្គម ការអភិវឌ្ឍន៍ និង ចំណេះដឹងផ្សេងៗ ដែលមានប្រយោជន៍ចំពោះសង្គម ក៏ដូចជាប្រទេសជាតិ។ យ៉ាងណាមិញ បើនិយាយអំពីប្រវត្តិរបស់លោកវិញ ប្រិយមិត្តមួយចំនួនធំហាក់មិនសូវជាបានដឹងប៉ុន្មានឡើយ។ សូម្បីអ្នកខ្លះ ក៏បានកំពុងគាំទ្រទំនិញរបស់ក្រុមហ៊ុនលោកជាប្រចាំផងដែរ។
យោងតាម សមាគមឧកញ្ញ៉ាកម្ពុជា ឧកញ៉ា តាន់ មុនីវណ្ណ គឺជាសមាជិកក្រុមប្រឹក្សាភិបាល នៃសមាគមឧកញ៉ាកម្ពុជា និង ជាស្ថាបនិក និង ប្រធានក្រុមហ៊ុន ១៦៨ វីនសូ ឯ.ក (168 Winsou Co., Ltd.) ដែលជាប្រភេទអាជីវកម្មលក់សម្ភារបរិក្ខារ និង ជាផ្សារទំនើបខ្នាតតូចលក់ទំនិញជាងមួយម៉ឺនមុខជាមួយនឹងគុណភាពខ្ពស់។
ឧកញ៉ា គឺជាធុរជនពោរពេញដោយបទពិសោធ និង វិជ្ជាជីវៈខ្ពស់ ដែលអាចប្រើប្រាស់ភាសាខ្មែរ និង អង់គ្លេសយ៉ាងស្ទាត់ជំនាញ និង បានបញ្ចប់ការសិក្សាកម្រិតបរិញ្ញាបត្រនីតិសាធារណៈ អនុបណ្ឌិតគ្រប់គ្រងការអភិវឌ្ឍន៍ជនបទ អនុបណ្ឌិតគ្រប់គ្រងសេដ្ឋកិច្ច បណ្ឌិតគ្រប់គ្រងពាណិជ្ជកម្ម និង រដ្ឋបាល (DBA) បណ្ឌិតច្បាប់ និង វិទ្យាសាស្រ្តសេដ្ឋកិច្ច និង បណ្ឌិតគ្រប់គ្រងរដ្ឋបាលសាធារណៈផងដែរ។
ជាមួយគ្នានេះ ឧកញ៉ាមានបទពិសោធការងាររយៈពេលជាង ២៥ ឆ្នាំ លើកិច្ចការពាណិជ្ជកម្មជាតិ-អន្តរជាតិ ទំនាក់ទំនងជាតិ-អន្តរជាតិ និង កិច្ចការច្បាប់ទូទៅជាមួយអន្តរវិស័យ។
ក្រៅពីការងារធុរកិច្ច នាពេលកន្លងមក លោកឧកញ៉ាបានចូលរួមចំណែកយ៉ាងសកម្មក្នុងការងារសង្គម និង សប្បុរសធម៌នានា ជាពិសេស ការជួយគាំទ្រជាមួយរាជរដ្ឋាភិបាលកម្ពុជា តាមរយៈការបំពេញការងារជាទីប្រឹក្សាអមក្រសួងបរិស្ថាន ទីប្រឹក្សាអមគណៈរដ្ឋមន្រ្តី អនុប្រធានសភាពាណិជ្ជកម្មកម្ពុជា ប្រធានសហព័ន្ធយានយន្តកម្ពុជា ទីប្រឹក្សាសមាគមសហគ្រិនស្រ្តីកម្ពុជា ទីប្រឹក្សាជាន់ខ្ពស់នៃសមាគមអ្នកអភិវឌ្ឍន៍លំនៅឋានកម្ពុជា តំណាងអគ្គលេខាធិការសមាគមអ្នកសាងសង់កម្ពុជា អនុសហប្រធានក្រុមការងារ វិស័យកសិកម្ម កសិ-ឧស្សាហកម្ម និង អនុសហប្រធានក្រុមការងារ វិស័យសំណង់ និង អចលនទ្រព្យកម្ពុជា៕
