អ្នកជិតខាង គឺជាញាតិភូមិផងរបងជាមួយដែលអាចពឹងពាក់ម្ដងម្កាល យោគយល់អធ្យាស្រ័យគ្នាក្នុងការរស់នៅ តែងប្រាស័យទាក់ទងសួរនាំគ្នាទៅវិញទៅមក ប្រកបដោយភាពសុខដុមរមនា។ ការរស់នៅដែលមានអ្នកជិតខាងល្អ ចាត់ទុកថាជាសំណាងផលបុណ្យដែលបានសាង ព្រោះថាមានសេចក្ដីសុខ និង ភាពកក់ក្ដៅ តែបើបានជួបអ្នកជិតខាងដែលមានចិត្តកំណាញ់ ដែលមានតែបញ្ហាមិនចេះយោគយល់អធ្យាស្រ័យគ្នា នោះអាចនាំឱ្យលោកអ្នកនឿយចិត្តក្នុងការរស់នៅបន្តិចហើយ។
នេះដូចទៅនឹងរឿងរ៉ាវខ្លីមួយដែលគេសម្ដែង និង បានបង្ហោះនៅលើបណ្ដាញសង្គមមានចំណងជើង «រស់តែឯង» ដែលតាមរយៈវីដេអូ បានបង្ហាញពីអត្តចរិតអ្នកចិត្តខាងមួយរូប ដែលមានចិត្តចង្អៀតចង្អល់ មិនឱ្យអ្នកជិតខាងចតរថយន្តនៅទីធ្លាមុខផ្ទះ មិនឱ្យសូម្បីអ្នកលក់ដូរពពាយនាយដោយរអ៊ូថាបង្កការរំខានដល់ខ្លួន និង ចុងក្រោយបានហាមឃាត់អ្នកជាប់ផ្ទះជាមួយមិនឱ្យដាំដុះបែបនេះបែបនោះជាដើម ទើបត្រូវគេនិយាយពាក្យពិតចំៗ ឱ្យរៀនបើកចិត្តឱ្យទូលាយរស់នៅមើលគេមើលឯង ទើបស្លេកមុខបាត់មាត់បាត់កឈឹងតែម្ដង។
តាមរយៈសាច់រឿងនេះផងដែរ បានផ្ដល់នូវការអប់រំដ៏ល្អមួយសម្រាប់ការរស់នៅនាពេលបច្ចុប្បន្ន ព្រោះថាការរស់នៅប្រចាំថ្ងៃ ពិសេសនៅក្នុងសហគមន៍ ឬ ទីភូមិផងរបងជាមួយ ពិតណាស់អ្នកត្រូវចេះរៀនសម្របខ្លួនរស់នៅជាមួយគេឯង និង មិនប្រើសិទ្ធិជាអ្នកជិតខាងដើរក្រិតក្រមអ្នកនេះអ្នកនោះ ដើម្បីតែអារម្មណ៍ខ្លួនឯង ទាំងដែលរឿងទាំងនោះពិតជាមិនធំដុំ និង មិនបង្កការរំខាន់ពេកនោះឡើយ៕ សូចចុចទីនេះដើម្បីទស្សនាវីដេអូ
