គ្រោះទឹកជំនន់ជាប្រវត្តិសាស្ត្រនៅខេត្ត Songkhla ភាគខាងត្បូងប្រទេសថៃ បានបង្ខំឱ្យប្រទេសថៃជាម្ចាស់ផ្ទះព្រឹត្តិការណ៍ Sea Games លើកទី ៣៣ ត្រូវរៀបផែនការបន្ទាន់ភ្លាមៗ ដោយផ្លាស់កម្មវិធីប្រកួតកីឡាចំនួន ១០ ទៅធ្វើនៅទីក្រុងបាងកក និង Chonburi វិញ។
ខេត្ត Songkhla ដែលជាទីតាំងមួយក្នុងចំណោមទីតាំងចំនួន ៣ សម្រាប់រៀបចំការប្រកួតព្រឹត្តិការណ៍ Sea Games លើកទី ៣៣ ដោយដំបូងឡើយគឺគ្រោងនឹងទុកជាទីតាំងប្រកួតកីឡាចំនួន ១០ រួមមាន កីឡាបាល់ទាត់បុរសក្រុម B, កីឡាប៉េតង់, កីឡាបោកចំបាប់, ប្រដាល់មួយថៃ, បញ្ចសីលា, អុក, ជូដូ, កីឡាលេងអ៊ូ, ការ៉ាត់តេដូ និង កីឡាវូស៊ូ ដោយមានមេដាយមាសសរុបចំនួន ១០៩។
យ៉ាងណាមិញ រាល់សង្កាត់ទាំង ១៦ នៅក្នុងខេត្ត Songkhla នេះ គឺកំពុងរងគ្រោះដោយទឹកជំនន់ធ្ងន់ធ្ងរ ទើបខាងអាជ្ញាធរកីឡាប្រចាំប្រទេសថៃ (SAT) ដាក់ចេញគម្រោងផ្លាស់ប្ដូរជាបន្ទាន់នៃការប្រកួតកីឡាទាំង ១០ ខាងលើនេះទៅកាន់ទីតាំងប្រកួតចំនួន ២ ផ្សេងទៀត។ ជាមួយនឹងគម្រោងផ្លាស់ប្ដូរទីតាំងបន្ទាន់នេះផងដែរ ក្នុងនាមជាម្ចាស់ផ្ទះ ប្រទេសថៃក៏កំពុងពិចារណាលើការសងសំណងដល់បណ្ដាប្រទេសដែលចូលរួមប្រកួតមួយចំនួន បន្ទាប់ពីក្រុមជម្រើសជាតិខ្លះបានកក់សំបុត្រយន្តហោះ ក៏ដូចជាសណ្ឋាគារនៅខេត្ត Songkhla រួចរាល់ហើយ។
