កាលពីថ្ងៃទី ១០ ខែសីហា ឆ្នាំ ២០២៥ កន្លងទៅ មានការចែកចាយករណីដ៏ហួសចិត្តមួយក្នុងប្រទេសថៃ ដែលសិស្សប្រុសថ្នាក់ទី ១១ ម្នាក់ បានវាយគ្រូបង្រៀនស្រីឡើងទ្រោមខ្លួន ព្រោះតែខឹងរឿងពិន្ទុប្រឡង។
តាមព័ត៌មានបានឱ្យដឹងថា នៅថ្ងៃកើតហេតុ គ្រូបានប្រកាសលទ្ធផលប្រឡងនៅក្នុងថ្នាក់ ហើយសិស្សជាជនបង្កហេតុក៏បានដើរមកសួរពិន្ទុរបស់ខ្លួនជាមួយគ្រូ។ អ្នកគ្រូបានប្រាប់ថា សិស្សរូបនេះបានពិន្ទុត្រឹមតែ ១៨ ពិន្ទុ ព្រោះឆ្លើយសំណួរមិនបានពេញលេញ សិស្សនេះក៏បង្ហាញការមិនពេញចិត្ត និង ចាប់ផ្តើមរករឿងអ្នកគ្រូ ដោយការធាក់តុ ហើយចង់ឱ្យគ្រូសុំទោសខ្លួនទៀត។
លុះគ្រូនិយាយពន្យល់ប្រាប់ហេតុផល ស្រាប់តែសិស្សនេះបានចូលទៅវាយតប់អ្នកគ្រូយ៉ាងកំរោល ហើយថែមទាំងជេរប្រមាថគ្រូជាពាក្យពេចន៍អសុរោះ រហូតដល់មានគ្រូផ្សេងៗចូលមកជួយឃាត់។ យ៉ាងណាមិញ អ្នកគ្រូបង្រៀនបានរងរបួសយ៉ាងធ្ងន់ធ្ងរ ដោយជាំពេញមុខ ពកក្បាលខាងឆ្វេង និង ស្រាំឆ្អឹងជំនី ហើយកំពុងតែសម្រាកព្យាលបាល។ ចំណែក សិស្សជាជនបង្កបានលាចេញពីសាលា និង ត្រូវអាជ្ញាធរណាត់ជួបដើម្បីធ្វើការសួរនាំផងដែរ៕
ប្រភព៖ Matichon
