ទាក់ទងនឹងស្មារតីស្នេហាវិស័យសិល្បៈវប្បធម៌ខ្មែររបស់តារាចម្រៀងស្រី ទេព បូព្រឹក្ស និង លោក ជី ដេវីត កន្លងមកអ្នកទាំងពីរតែងទទួលបានការស្ងើចសរសើរខ្លាំងពីមហាជនចំពោះសកម្មភាពជួយផ្សព្វផ្សាយលើកស្ទួយពីវប្បធម៌ អរិយធម៌ខ្មែរ តាមរយៈស្នាដៃ MV បទចម្រៀង ក៏ដូចជារូបភាពផ្សេងៗបង្ហាញលើបណ្ដាញសង្គម។
លើសពីនេះ ប្ដីប្រពន្ធតារាចម្រៀងមួយគូនេះ ក៏តែងពាំនាំនូវទម្រង់សិល្បៈវប្បធម៌ជាច្រើនទៅបង្ហាញនូវក្រៅប្រទេស តាមរយៈកម្មវិធីអន្តរជាតិផ្សេងៗឱ្យពិភពលោកបានស្គាល់ពីសម្បត្តិវប្បធម៌កម្ពុជាកាន់តែច្បាស់ដែរ។
បើនិយាយពីព្រឹត្តិការណ៍ធំៗ តារាចម្រៀងប្រុសស្រីមួយគូនេះ បានបង្កើតឡើងច្រើនលើកមកហើយ ដើម្បីចូលរួមផ្សព្វផ្សាយសម្បត្តិវប្បធម៌ខ្មែរ ដែលគេចាំបានថាកាលពីដើមឆ្នាំ ២០២៤ កន្លងទៅ អ្នកនាង ទេព បូព្រឹក្ស ក៏រៀបចំកម្មពិធីសម្ភោធ MV ចម្រៀង «ទេវរាជ» ដែលមានការៀបចំសម្ដែងនូវផ្ទាំងទស្សនីយភាពវប្បធម៌ខ្មែរជាច្រើនទម្រង់ ព្រមទាំងអ្នកចូលទស្សនាផ្ទាល់ ក៏សុទ្ធសឹងតែបង្ហាញខ្លួនក្នុងឈុតសម្លៀកបំពាក់ប្រពៃណី និង បុរាណខ្មែរដ៏ប្រណីតៗ បង្កើតបានជាទិដ្ឋភាពកាន់តែអស្ចារ្យ និង រំភើបបំផុត។
ដោយឡែក មកដល់ថ្មីៗនេះ អ្វីដែលធ្វើឱ្យមហាជនអ្នកគាំទ្រចាប់អារម្មណ៍ និង រំភើបទៀត ខណៈបានឃើញហ្វេសប៊ុកផេករបស់តារាចម្រៀងស្រី ទេព បូព្រឹក្ស បានប្រកាសពីការត្រៀមចំព្រឹត្តិការណ៍វប្បធម៌ដ៏ធំនេះជាថ្មី ដែលមានការសម្ដែងនូវផ្ទាំងទស្សនីយភាពសិល្បៈបុរាណជាច្រើនទម្រង់ ដើម្បីចូលរួមជួយផ្សព្វផ្សាយ លើកស្ទួយសម្បត្តិវប្បធម៌ខ្មែរកាន់តែទូលំទូលាយផងដែរ៕
