ទើបអាយុ ១៦ ឆ្នាំសោះក្លាយជាម៉ែ យ៉ែម ចេះល្បួងមិត្តភក្តិឱ្យទៅលក់សេ-វា-កម្មតាំងពីថ្នាក់ទី ៧ រួចកេងប្រវ័ញ្ចហូតយកកុំមីស្យុង

កាលពីថ្ងៃទី ១៩ ខែសីហា ឆ្នាំ ២០២៥ កន្លងទៅនេះ អាជ្ញាធរខេត្តបុរីរ៉ាំ ប្រទេសថៃ បានឃាត់ខ្លួនក្មេងស្រីវ័យ ១៦ ឆ្នាំម្នាក់ ក្នុងករណីល្បួងមិត្តភក្តិឱ្យលក់សេវាកម្មផ្លូវភេទ ហើយខ្លួនឯងកាច់កេងប្រវ័ញ្ចយកកុំមីស្យុង។

តាមព័ត៌មានបានឱ្យដឹងថា ក្មេងស្រីខាងលើនេះមានវ័យ ១៦ ឆ្នាំ ជាសិស្សវិទ្យាល័យនៅឡើយ តែនាងបានតាំងខ្លួនជាម៉ែយ៉ែម បបួលមិត្តភក្តិស្រីម្នាក់ទៀតឱ្យទៅលក់សេវាកម្មផ្លូវភេទឱ្យមនុស្សចាស់តាំងពីនៅថ្នាក់ទៅទី ៧។ ព័ត៌មានបានឱ្យដឹងទៀតថា មិត្តភក្តិនាងលក់សេវាកម្មម្តងបានប្រមាណជា ១៥០០ បាត ដំបូងៗនាងហូតយកអស់ ៥០០ បាត យូរៗទៅក៏យក ១០០០ បាត។ មិនត្រឹមតែប៉ុណ្ណេះ នាងបានបង្ខំឱ្យមិត្តភក្តិប៉ាវអាហារ ឬទិញរបស់របរឱ្យនាងទៀត ដែលចុងក្រោយម្ចាស់ខ្លួនបានសល់ប្រាក់ត្រឹមតែ ២០០ ទៅ ៣០០ បាតប៉ុណ្ណោះ។

យ៉ាងណាមិញ ពេលនេះក្មេងស្រីម៉ែយ៉ែម ខាងលើ ត្រូវបានប៉ូលិសឃាត់ខ្លួន ហើយចោទប្រកាន់ជាបណ្តោះអាសន្នជាច្រើនករណីដូចជា ការជួញដូរមនុស្ស ល្បួងមនុស្សអាយុក្រោម ១៨ ឆ្នាំទៅធ្វើពេស្យាចារ ល្បួងឱ្យកុមារប្រព្រឹត្តទង្វើមិនសមរម្យ ការពង្រាត់កុមារពីឪពុកម្តាយ និង ការទទួលផលចំណេញពីពេស្យាចាររបស់អ្នកដទៃ។ ដោយឡែក ខាងប៉ូលិសក៏កំពុងស្រាវជ្រាវរកអ្នកដែលទិញសេវាកម្មពីក្មេងស្រីខាងលើនេះដូចគ្នា៕

ប្រភព៖ Khaosod