សារព័ត៌មាន Mirror Media បានរាយការណ៍ពីករណីរបស់លោក Yang Zhixiong ជាប្រធានក្រុមហ៊ុនស៊ីម៉ងត៍ធំមួយរបស់តៃវ៉ាន់ ដែលត្រូវភរិយាចេញមកទម្លាយថាសុខចិត្តចំណាយប្រាក់រាប់លានដុល្លារ ដើម្បីចាយសប្បាយជាមួយស្រីៗ តែជាមួយអ្នកផ្ទះឯងវិញបែរជាកំណាញ់បេះមិនចេញ។
តាមស្រ្តីជាភរិយាបានរៀបរាប់បានឱ្យដឹងថា ស្វាមីបានចំណាយប្រាក់ជាង ១៦០ លានដុល្លារតៃវ៉ាន់ ដែលស្មើប្រមាណជិត ៥ លានដុល្លារ ក្នុងការទិញទូកទេសចរណ៍ដ៏ប្រណីតមួយ ដើម្បីនាំស្រីៗទៅជប់លៀងសប្បាយជារៀងរាល់ចុងសប្តាហ៍។ ចំណែកនាងវិញ ប្តីឱ្យលុយឱ្យត្រឹម ១០០០០ ដុល្លារតៃវ៉ាន់ ដែលស្មើប្រមាណ ៣០០ ដុល្លារប៉ុណ្ណោះក្នុងមួយខែ ដើម្បីឱ្យនាងចាត់ចែងរឿងផ្ទះសម្បែង។ លើសពីនេះទៀត ប្តីក៏ធ្លាប់នាំស្រីមកចូលក្នុងផ្ទះបញ្ឈឺនាងផ្ទាល់មុខទៀត។ រីឯរឿងមួយទៀត ប្ដីឱ្យអ្នកបម្រើធ្វើម្ហូបខ្លួនឯង ហើយនឹងប្រពន្ធផ្សេងពីគ្នា ហើយពេលធ្វើម្ហូបត្រូវឱ្យខ្លួនឃើញដោយផ្ទាល់ភ្នែក ព្រោះខ្លាចអ្នកផ្ទះលួចដាក់ថ្នាំបំពុល។
យ៉ាងណាមិញ បុរសជាប្តីបានចេញមុខមកបដិសេធថា ខ្លួនមិនបានធ្លាប់នាំស្រីចូលផ្ទះឡើយ ហើយចំណែករឿងស្រីៗនៅលើទូកនោះវិញ គឺមិត្តភក្តិជាអ្នកនាំទៅ រីឯខ្លួនគ្រាន់តែទៅកម្សាន្តជាមួយគេតែប៉ុណ្ណោះ ដោយឡែករឿងលុយ ៣០០ ដុល្លារនោះ គឺជាលុយឱ្យប្រពន្ធចាយលេងធម្មតាប៉ុណ្ណោះ ព្រោះមុននេះក៏ធ្លាប់ឱ្យលុយប្រពន្ធរាប់ម៉ឺនដុល្លារទៅហើយដែរ៕
ប្រភព៖ Kapook
