រយៈពេលប៉ុន្មានឆ្នាំ ក្រោយភរិយាទី ២ រត់ចោល បន្សល់ទុកកូនៗទាំង ៣ ឱ្យលើកចិញ្ចឹមបីបាច់ ដោយមានជីវភាពលំបាក ស្របពេលកាយសម្បទាមិនពេញលេញលក្ខណៈដូចបុរសដទៃក្តីតែ នាយក្រិន បានបំពេញតួនាទីធ្វើជាឪពុកបានយ៉ាងល្អ ចិញ្ចឹមបីបាច់កូនៗដល់មកដល់បច្ចុប្បន្ន។ ក្នុងនោះដែរ ជាង ១ ឆ្នាំ ចុងក្រោយនេះ នាយក្រិន បានវិលត្រឡប់ចូលមកកាន់វិថីសិល្បៈវិញហើយ ដោយមានទាំងកូនៗ មកសម្តែងជាមួយគ្នាទៀតផង។
ដោយឡែក ថ្មីៗនេះ នាយក្រិន និង កូនៗ បានចូលរួមកម្មវិធី 3 Fun កាន់តែទទួលបានការអាណិតស្រឡាញ់ពីបងប្អូន ខណៈកូនស្រីពៅរបស់លោក បានទម្លាយពីភាពលំបាកកន្លងមកក្នុងគ្រួសារ។ ក្នុងនោះដែរ គេបានឃើញមានសិល្បករ សិល្បការិនីជាច្រើនបានចូលរួមជូនថវិកាដល់ នាយក្រិន និង កូនៗ ដើម្បីសម្រួលដល់ជីវភាពខ្លះៗផងដែរ។
ងាកទៅកាន់ តារាចម្រៀង ថុល សុភិទិ និង គូស្នេហ៍ គឺអ្នកនាង ឡុង ម៉ានីន ក៏បានចូលរួមជូនថវិការជួយដល់ នាយក្រិន ដូចគ្នាដែរ ដោយគូស្នេហ៍មួយគូនេះ បានជូនថវិកាចំនួន ៥០០ ដុល្លារ និង អង្ករ ២ ប៉ាវ ដល់ នាយក្រិន និង កូនៗ។
ក្នុងនោះអ្វីដែលគួរឱ្យចាប់អារម្មណ៍ ក្រោយជូនថវិកាមួយចំនួនដល់ នាយក្រិន ហើយនោះ អ្នកនាង ឡុង ម៉ានីន ក៏បានបង្ហោះសារថា៖ «កាលនៅតូច ជីវភាពក្រក្សត់ ខ្ញុំមានបំណងប្រាថ្នា ចង់មានហូបចុកគ្រប់គ្រាន់ និង បានរស់នៅជុំគ្រួសារដូចគេ តែសព្វថ្ងៃ វាមកលើសការរំពឹងពេក ចឹងបានខ្ញុំចូលចិត្តយកទៅធ្វើបុណ្យ និង ចែករំលែកបន្តរហូត»៕
