ការិយាល័យព្រះបរមរាជវាំងថៃ បានរាយការណ៍ឱ្យដឹងថា ព្រះមហាក្សត្រីយានី ស៊ីរិគិត ដែលជាព្រះមាតាបង្កើតរបស់ស្តេចថៃ បានសោយទីវង្គតហើយនាព្រជន្ម ៩៣ វសង្សា នៅវេលាម៉ោង ៩ និង ២១ នាទីយប់ កាលពីថ្ងៃទី ២៤ ខែតុលា ឆ្នាំ ២០២៥ កន្លងទៅនេះ។
តាមព័ត៌មានបានឱ្យដឹងថា ព្រះមហាក្សត្រីយានី ស៊ីរិគិត បានសម្រាកព្យាបាលព្រះកាយនៅមន្ទីរពេទ្យជូឡាឡុងកន សមាគមកាកបាទក្រហមថៃ តាំងពីឆ្នាំ ២០១៩ កន្លងទៅម្ល៉េះ ហើយចាប់ថ្ងៃទី ១៧ ខែតុលា ឆ្នាំ ២០២៥ មកនេះ អាការរបស់ទ្រង់ក៏កាន់តែធ្ងន់ធ្ងរទៅៗ ដោយសារការឆ្លងមេរោគឈាម។
យ៉ាងណាមិញ ព្រះមហាក្សត្រមហាវិជ្ជរ៉ាឡុងកន បានចេញព្រះរាជបញ្ជាទៅកាន់ការិយាល័យព្រះបរមរាជវាំងឱ្យរៀបចំព្រះសពរបស់ព្រះមាតា តាមព្រះរាជកិត្តិយសខ្ពស់បំផុតតាមប្រពៃណីរាជវង្ស ព្រមទាំងបញ្ជាឱ្យសមាជិកនៃព្រះរាជវង្សានុវង្ស និង មន្ត្រីរាជវាំងទាំងអស់កាន់ទុក្ខចំនួន ១ ឆ្នាំ ដោយព្រះបរមសពត្រូវតម្កល់នៅក្នុងសាលបល្ល័ង្កឌុសិតមហាប្រាសាទក្នុងព្រះបរមរាជវាំងផ្ទាល់៕
