យន្តហោះ Jeju Air ដឹកអ្នកដំណើរ ១៧៥ នាក់ និង បុគ្គលិកចំនួន ៦ នាក់ បានជួបសោកនាដកម្មបុកនឹងជញ្ជាំងព្រលានយន្តហោះ Muan កូរ៉េខាងត្បូង កាលពីព្រឹកថ្ងៃទី ២៩ ខែធ្នូ ឆ្នាំ ២០២៤ កន្លងទៅ រហូតផ្ទុះឆាបឆេះគួរឱ្យរន្ធត់ជាទីបំផុត។ តាមការបញ្ជាក់ពីមន្ត្រីនៃនាយកដ្ឋានអគ្គិភ័យប្រចាំខេត្ត Jeonnam បានឱ្យដឹងថា ក្នុងហេតុការណ៍គ្រោះថ្នាក់នេះមានមនុស្សតែ ២ នាក់ប៉ុណ្ណោះអាចរួចផុតជីវិត ខណៈជនរងគ្រោះ ១៧៩ នាក់ផ្សេងទៀតបានបាត់បង់ជីវិតទាំងអស់។
គួរឱ្យដឹងថា ដំបូងឡើយខាងសារព័ត៌មានកូរ៉េខាងត្បូងចេញផ្សាយថាជនរងគ្រោះដែលសង្គ្រោះបានមានម្នាក់ជាអ្នកដំណើរស្ត្រីស្ថិតក្នុងវ័យខ្ទង់ ២០ ឆ្នាំ និង ម្នាក់ទៀតជាអូតែសប្រុសឈ្មោះ Lee Mo។ យ៉ាងណាមិញ ភ្នាក់ងារសារព័ត៌មាន Yonhap ក្រោយមកបានស្រង់សម្ដីពីខាងមន្ត្រីផ្នែកអគ្គិភ័យថា នារីរងគ្រោះមានឈ្មោះហៅក្រៅថា Koo តាមពិតក៏ជាអូតែសដូចគ្នាដែរ។
ទាំង Lee និង Koo គឺជាអូតែសបម្រើអ្នកដំណើរនៅកាប៊ីនខាងក្រោយយន្តហោះ ហើយមុនពេលយន្តហោះចុះចត លោក Lee បានអង្គុយនៅកៅអីរបស់អូតែសខាងក្រោយយន្តហោះ រួមទាំងបានពាក់ខ្សែក្រវាត់ការពារផងដែរ។ នៅពេលកើតហេតុ លោក Lee ដឹងថាយន្តហោះបានចុះប៉ះដីហើយ ប៉ុន្តែរឿងកើតឡើងក្រោយមកទៀតលោកមិនបានចងចាំអ្វីនោះឡើយ។
ក្រោយដឹងខ្លួននៅមន្ទីរពេទ្យមួយនាក្រុង Mokpo លោក Lee បានស្រែកសួរថា៖ «មានរឿងអ្វីកើតឡើងហ្នឹង? ហេតុអ្វីខ្ញុំនៅទីនេះ?»។ បើតាមការបញ្ជាក់ពីក្រុមគ្រូពេទ្យដែលព្យាបាលលោក Lee បានលើកឡើងថា ដោយសារជនរងគ្រោះរងការតក់ស្លុតខ្លាំងពេក និង ទំនងធ្វើឱ្យលោកបាត់ការចងចាំ ដូច្នេះហើយទើបរូបលោកបន្តសួរដដែលៗជុំវិញហេតុការណ៍ដែលបានកើតឡើង។ គួរបញ្ជាក់ថា លោក Lee បានរងរបួសបាក់ស្មាខាងឆ្វេង និង រងរបួសក្បាល ប៉ុន្តែលោកបានដឹងខ្លួន និង អាចដើរបានធម្មតា៕
ប្រភព៖ VN Express
