ថ្មីថ្មោងនេះ CEO ក្រុមហ៊ុនទឹកស្ព្រីងប្រូវីដា លោក អ៊ឹង ស៊ីវឈន់ បង្ហោះរូបភាព proposal សុំគូស្នេហ៍រៀបការ ធ្វើឱ្យមហាជនជាច្រើនពិតជាមានការភ្ញាក់ផ្អើល និង រំភើប ដោយបានចូលទៅ comment អបអរជាហូរហែ។ អ្វីដែលមហាជនកាន់តែចាប់អារម្មណ៍ទៀតនោះ គូស្នេហ៍របស់លោក ជាបុត្រីក្នុងសែរាជវង្ស សមប្រកបទាំងរូបសម្រស់ ចំណេះដឹង និង វណ្ណៈ។
ជាក់ស្តែង គូស្នេហ៍របស់ លោក អ៊ឹង ស៊ីវឈន់ គឺព្រះអង្គម្ចាស់ក្សត្រិយ៍ នរោត្តម ពង្សសូរិយា។ ទ្រង់ជាព្រះបុត្រីរបស់សម្តេចព្រះមហិស្សរា នរោត្តម ចក្រពង្ស ឧត្តមប្រឹក្សាផ្ទាល់របស់ព្រះមហាក្សត្រ ព្រះករុណាព្រះបាទសម្តេចព្រះបរមនាថ នរោត្តម សីហមុនី និង ជាសមាជិកក្រុមប្រឹក្សាធម្មនុញ្ញ និង ព្រះមាតាព្រះនាម មែន កែវមុនីរ៉ែន។ ទ្រង់ប្រសូតនៅរាជធានីភ្នំពេញ នៅថ្ងៃទី ២៥ ខែ វិច្ឆិកា ឆ្នាំ ១៩៩៧ ។ គិតមកដល់សព្វថ្ងៃនេះ ទ្រង់មានព្រះជន្ម ២៧ វស្សា ហើយទ្រង់បានបញ្ចប់ការសិក្សាថ្នាក់បរិញ្ញាបត្រប្រកបដោយចំណេះដឹងខ្ពង់ខ្ពស់។
រម្លឹកការសិក្សា ទ្រង់បានចាប់ផ្តើមសិក្សានៅសាលារៀនឯកជនមួយឈ្មោះថា សាលារៀនអន្តរជាតិភ្នំពេញ (International School of Phnom Penh) ។ ទ្រង់បានបន្តការសិក្សានៅទីនោះ រហូតបញ្ចប់ថ្នាក់វិទ្យាល័យនៅក្នុងឆ្នាំ ២០១៥ ហើយក៏បានសម្រេចព្រះទ័យចាកចេញពីប្រទេសកម្ពុជា ទៅបន្តការសិក្សានៅក្រៅប្រទេសអស់រយៈពេល ៥ ឆ្នាំ។ នៅទីនោះ ទ្រង់បានសិក្សាជំនាញឯកទេសនយោបាយអន្តរជាតិ នៅសាកលវិទ្យាល័យពាណិជ្ជកម្មអន្តរជាតិ និង សេដ្ឋកិច្ច (University of International Business and Economics) នៃរដ្ឋធានីប៉េកាំង សាធារណរដ្ឋប្រជាមានិតចិន។ បច្ចុប្បន្ន ទ្រង់កំពុងរស់នៅលើទឹកដីកម្ពុជា ហើយក៏ឮមកថា ទ្រង់បានបង្កើតជំនួញមួយចំនួនផងដែរ៕
