ស្របពេលបញ្ហាព្រំដែនរវាងកម្ពុជា ថៃ នៅមិនទាន់វិលមកសភាពដើមវិញ បើទោះជាបទឈប់បាញ់បានចូលជាធរមានតាំងពីយប់ថ្ងៃទី ២៨ ខែកក្កដា ឆ្នាំ ២០២៥ វេលាម៉ោង ២៤:០០ ហើយក្តី។ ក្នុងនោះ រយៈពេលនៃសង្គ្រាមរយៈពេល ៥ យប់ ៥ ថ្ងៃ ដែលចាប់ផ្តើមឡើងដោយទាហានថៃមុននោះ បានធ្វើឱ្យកងកម្លាំងជួរមុខកម្ពុជាពលីជីវិត និង រងរបួសជាច្រើនរូប ខណៈប្រជាជនតាមតំបន់ត្រូវបានជម្លៀសចេញទៅកាន់ទីសុវត្ថិភាព។
ស្របពេលកំពុងក្តោបការឈឺចាប់ និង ដឹងគុណនៃការពលីជីវិត និង រងរបួសរបស់កងកម្លាំងជួរមុខ ថ្មីៗនេះ អ្នកលេងបណ្តាញសង្គមហ្វេសប៊ុក ជាពិសេសប្រជាជនកម្ពុជា បានផ្ទុះការសរសើរដល់ទាហានកម្ពុជា ២ រូប ដែលជាភេទទី ៣ ឈរជើងការពារទឹកដីតតាំងជាមួយសត្រូវយ៉ាងអង់អាចក្លាហាន។
ក្នុងនោះដែរ មានលោកព្រិន្ទបាល សេង ញឹម និង លោកព្រិន្ទបាល ប៉ែន រ៉ន ដែលជាទាហាននៅវរៈ 212 (បន្ទាយទាហាន 75) ស្ថិតនៅឃុំទន្លូង ស្រុកមេមត់ ខេត្តត្បូងឃ្មុំ កំពុងឈរជើងនៅសមរភូមិប្រាសាទតាក្របី។
ដោយឃើញនូវភាពអង់អាចក្លាហានរបស់លោកព្រិន្ទបាលទាំង ២ រូប ខាងលើ បើទោះជាភេទទី ៣ ក៏ពិតមែន ប៉ុន្តែលោកទាំង ២ មិនទន់ជ្រាយនោះឡើយនូវការចេញប្រយុទ្ធការពារប្រទេសជាតិគួរឱ្យស្ញប់ស្ញែង៕
រូបភាព៖ តាំង គីមឡេង & Peypey Dy
