ថ្មីៗនេះ មានរឿងរ៉ាវមួយបានកំពុងធ្វើឱ្យកក្រើកក្នុងបណ្តាញសង្គមរបស់ចិន ដែលមានស្រ្តីម្នាក់ភ្លាត់ធ្លាក់ចូលទៅអណ្តូងកណ្តាលព្រៃ ស៊យអីក្នុងនោះមានសុទ្ធតែពស់ តែខំតោងជញ្ជាំងអណ្តូងអស់ ២ ថ្ងៃ ទម្រាំមានអ្នកនៅជួយ។
តាមព័ត៌មានបានឱ្យដឹងថា ស្រ្តីខាងលើនេះមានវ័យ ៤៨ ឆ្នាំ នាងជាអ្នកមកពីទីក្រុង Quanzhou ខេត្ត Fujian។ នៅថ្ងៃកើតហេតុនាងបានដើរទៅលេងក្នុងព្រៃនៅជិតផ្ទះ ស្រាប់តែបានភ្លាត់ជើងធ្លាក់ចូលទៅក្នុងអណ្តូងមួយ។ ក្នុងនោះនាងចេះហែលទឹក ប៉ុន្តែមិនអាចឡើងមកខាងលើបានឡើយ ម្យ៉ាងទៀតក្នុងអណ្តូងនោះសុទ្ធតែពស់ជាច្រើនក្បាល ដែលបង្ខំឱ្យនាងត្រូវតោងថ្មនៅជាប់ជញ្ជាំងអណ្តូងដើម្បីគេចចេញពីពួកវា។
នាងនៅជាប់ក្នុងអណ្តូងនោះប្រមាណជា ៥២ ម៉ោង ជាមួយនឹងសត្វពស់ រួមទាំងមូសយ៉ាងច្រើន ហើយនាងបានឱ្យដឹងថានាងអស់កម្លាំង និងអស់សង្ឃឹមជាច្រើនដងទៅហើយ នាងចង់តែលែងដៃហើយស្លាប់ក្នុងអណ្តូងនោះ តែនាងចេះតែនឹកឃើញដល់មុខម្តាយអាយុ ៧០ ឆ្នាំ និងឪពុកអាយុ ៨០ ឆ្នាំ ព្រមទាំងកូនស្រីសំណព្វចិត្តទើបតែចូលរៀនវិទ្យាល័យ នាងក៏តស៊ូនៅតោងបន្តទៀត រហូតដល់មានអ្នកមកឃើញ និងជួយសង្រ្គោះ។
ដោយឡែក តាមព័ត៌មានបានឱ្យដឹងថា ស្រ្តីរូបនេះ បានបាក់ឆ្អឹងជំនីរចំនួន ២ និងរបួសដៃ ព្រមទាំងសួតក៏មានការប៉ះពាល់បន្តិចបន្តួច តែពេលនេះនាងកំពុងតែសះស្បើយឡើងវិញបណ្តើរហើយៗ៕
