ថ្មីៗនេះ រឿងរ៉ាវមួយនៅប្រទេសចិន បានធ្វើឱ្យផ្ទុះការរំជួលចិត្តជាច្រើនពីសំណាក់មហាជន ដោយមានកូនកំលោះមួយរូប បានដាច់ចិត្តលោតទឹកសម្លាប់ខ្លួននៅក្នុងថ្ងៃមង្គលការ ក្រោយពីខ្ចីលុយគេមកធ្វើពិធីអស់ពីខ្លួនហើយ ត្រូវគ្រួសារខាងស្រីដាក់សម្ពាធទារលុយមិនឈប់ទៀត។
តាមព័ត៌មានបានឱ្យដឹងថា ហេតុការណ៍នេះបានកើតឡើងកាលពីថ្ងៃទី ៣ ខែតុលា ឆ្នាំ ២០២៥ កន្លងទៅ នៅទីក្រុង Xunyang ខេត្ត Shaanxi ប្រទេសចិន ដោយក្នុងនោះកូនកំលោះ មានមុខរបរជាគ្រូបង្រៀន។ នៅថ្ងៃមង្គលការ កូនកំលោះបានធ្វើដំណើរទៅទទួលខាងស្រីនៅឯផ្ទះទៅតាមប្រពៃណី តែត្រូវគ្រួសារនាងជំរិតទារលុយប្រមាណជាង ២ ពាន់ដុល្លារ ដោយអះអាងថាជាថ្លៃឱ្យក្រមុំចុះពីលើឡាន។
កូនកំលោះមិនមានលុយគ្រប់ឡើយ ព្រោះកន្លងមកបានប្រើលុយរបស់ខ្លួន រួមទាំងខ្ចីគេថែម មកចាត់ចែងពីធីមង្គលការនេះអស់ទៅហើយ។ ដោយមានអារម្មណ៍ថាមានសម្ពាធពេក និងអស់សង្ឃឹមផង កូនកំលោះក៏បានរត់ទៅលោតទឹកសម្លាប់ខ្លួនពីលើស្ពាន Xunhe នៅក្នុងថ្ងៃមង្គលការរបស់ខ្លួនតែម្តង ដែលបង្កឱ្យមានការភ្ញាក់ផ្អើលជាខ្លាំង ជាពិសេសគឺម្តាយសឹងតែខ្យល់គទៅហើយ។ យ៉ាងណាមិញ បន្ទាប់ពីកើតហេតុហើយមួយថ្ងៃ សពរបស់កូនកំលោះនៅតែរកមិនទាន់ឃើញនៅឡើយ៕
