នៅព្រឹកថ្ងៃទី ២៦ ខែកក្កដា ឆ្នាំ ២០២៥ នេះ សារព័ត៌មានថៃ Khaosod English បានចេញផ្សាយថា កងទ័ពជើងទឹកថៃ ចាប់ផ្តើមប្រតិបត្តិការ «Trat Pikhart Pairee 1» បន្ទាប់ពីកម្ពុជាបើកការបាញ់ប្រហារពង្រីកតំបន់ជម្លោះដល់ខេត្តត្រាត ហើយខាងកម្លាំងការពារព្រំដែនចាន់ថាបុរី និង ត្រាតបានបាញ់តបវិញ។
នៅវេលាម៉ោង ៥ និង ១០ នាទីព្រឹក ថ្ងៃទី ២៦ ខែកក្កដា ឆ្នាំ ២០២៥ អ្នកសារព័ត៌មាននៅថៃបានទទួលព័ត៌មានថ្មីពីការប៉ះទង្គិចគ្នារវាងទាហានថៃ និង ខ្មែរនៅតាមព្រំដែន ដែលពេលនេះឈានចូលដល់ថ្ងៃទី ៣ ហើយ ។
សារព័ត៌មានថៃនេះបានចេញចោទថាទាហានកម្ពុជាបើកការបាញ់ប្រហារមុនលើទាហានថៃនៅម៉ោង ៥ និង ១០ នាទីព្រឹក នៅតំបន់បានចំរៀក ខេត្តត្រាត ហើយទាហានមកពីកងកម្លាំងការពារព្រំដែនចាន់ថាបុរី និង ត្រាត បានតបតវិញរហូតផ្តើមដល់ការប៉ះទង្គិចគ្នា។
ក្រោយមក កងទ័ពជើងទឹកភូមិន្ទថៃ បានបើកប្រតិបត្តិការហៅថា «Trat Pikhart Pairee 1» ដើម្បីរុញ និង បំផ្លាញតំបន់ដែលចោទថាទាហានកម្ពុជាបានទន្ទ្រានយកទឹកដីថៃចំនួនបីចំណុច។ មកដល់ម៉ោង ៥ និង ៤០ នាទីព្រឹក ភាគីថៃលើកឡើងថា កម្លាំងទ័ពជើងទឹកគេបានរុញភាគីកម្ពុជាចេញវិញដោយជោគជ័យ។ យ៉ាងណាមិញ នេះជាការលើកឡើងយ៉ាងគឃ្លើនពីសំណាក់ថៃ ដែលតាមការពិតថៃខ្លួនឯងបានលួចវាយប្រហារមកខ្មែរមុន។
អ្នកនាំពាក្យក្រសួងការពារជាតិ លោកស្រីឧត្តមសេនីយ៍ឯក ម៉ាលី សុជាតា
បើតាមក្រសួងការពារជាតិកម្ពុជា នៅព្រឹកថ្ងៃទី ២៦ ខែកក្កដា ឆ្នាំ ២០២៥ នេះ បានបញ្ជាក់ឱ្យបានដឹងថា ភាគីថៃបានឈ្លានពានដោយមិនមានការបង្កហេតុ និង ដោយត្រៀមទុកជាមុន នៅវេលាម៉ោង ០៥:០២ នាទី ថ្ងៃទី ២៦ ខែកក្កដា ឆ្នាំ ២០២៥ នេះ ដោយបានបើកការវាយប្រហារដោយកាំភ្លើងធំចំនួន ៥ គ្រាប់ មកលើទីតាំងជាច្រើនកន្លែង នៅក្នុងភូមិឯកភាព ឃុំថ្មដា ស្រុកវាលវែង ខេត្តពោធិ៍សាត់។
ក្នុងនោះ តាមរយៈព័ត៌មានក្នុងស្រុក បានឱ្យដឹងបន្ថែមថា នៅវេលាម៉ោងជិត ៨ ពួកទាហានឈ្លានពានថៃ បានចាប់ផ្តើមបាញ់មកបន្តទៀត ខណៈនៅពេលនេះកងទ័ពកម្ពុជា ស្ថិតនៅក្នុងត្រៀមវាយបកទៅវិញយ៉ាងចាស់ដៃ។
គួរឱ្យដឹងផងដែរថា ការរំលោភអធិបតេយ្យភាព និង បូរណភាពទឹកដីរបស់កម្ពុជាដ៏កម្រោលនេះ គឺជាការរំលោភបំពានយ៉ាងធ្ងន់ធ្ងរបំផុតលើច្បាប់អន្តរជាតិ រួមទាំងគោលការណ៍ដែលមានចែងក្នុងធម្មនុញ្ញអង្គការសហប្រជាជាតិ ហើយបានបង្កគ្រោះថ្នាក់ដល់អាយុជីវិតជនស៊ីវិលស្លូតត្រង់ និង បំផ្លាញសន្តិភាព និង ស្ថិរភាពក្នុងតំបន់៕
ប្រភព៖ Khaosod English
