បើរំឭកកាលពីប្រមាណជា ១០ ឆ្នាំមុន មហាជននិយមស្តាប់បទចម្រៀងពីដើមៗ នៅក្នុងផលិតកម្ម រៃមាស តោមាស ច្បាស់ជាបានស្គាល់នូវតារាចម្រៀងសំឡេងស្រទន់អ្នកនាង ឈួន ស្រីម៉ៅ ដែលជាប្អូនស្រីបង្កើតរបស់តារាចម្រៀង ឈួន សុវណ្ណឆៃ ជាក់ជាមិនខាន។
កាលនោះ គេចាំបានថា អ្នកនាង ឈួន ស្រីម៉ៅ គឺជាតារាស្រីមួយរូប ដែលមានប្រជាប្រិយភាព និង មិនត្រឹមតែល្បីក្នុងវិស័យចម្រៀងនោះទេ តែអ្នកនាង ក៏បានចូលរួមសម្តែងភាពយន្តមួយចំនួនផងដែរ។
ក្រោយសាងកេរ្តិ៍ឈ្មោះលើវិថីសិល្បៈនៅក្នុងប្រទេសកម្ពុជាជាច្រើនឆ្នាំហើយនោះ អ្នកនាង ឈួន ស្រីម៉ៅ បានចាកចេញទៅរស់នៅឯសហរដ្ឋអាមេរិកកាលពីអំឡុងដើមឆ្នាំ ២០១៥ បន្ទាប់ពីអ្នកនាងរៀបការបញ្ចប់ភាពនៅលីវហើយ។ ក្នុងនោះ ក្រោយរស់នៅសហរដ្ឋអាមេរិកជុំនឹងស្វាមី អ្នកនាង ឈួន ស្រីម៉ៅ ក៏បន្តដំណើរក្នុងអាជីពជាតារាចម្រៀងដូចដើមនៅឯនាយសមុទ្រ។
បច្ចុប្បន្ន អ្នកនាង ឈួន ស្រីម៉ៅ និង ស្វាមី កំពុងរស់នៅយ៉ាងមានសុភមង្គល និង ត្រៀមទទួលសមាជិកថ្មី ដែលជាកូនទី ២ ក្នុងគ្រួសារ បន្ទាប់ពីកូនប្រុសច្បងរបស់អ្នកនាងមានអាយុជាង ២ ឆ្នាំ៕
