ឌីជេ ក្តិប បង្ហើបឱ្យអ្នកគាំទ្រលួចញញឹម បន្ទាប់ពីបានរួមការងារនឹង វណ្ណដា ព្រមទាំងសិស្សប្អូនជំនាន់ក្រោយមួយរយៈ

ជាការពិតណាស់ អ្នកគាំទ្រនិយមតាមដានពីជីវិតការងារសិល្បៈរបស់ ឌីជេ ក្តិប ច្បាស់ជាបានជ្រាបហើយថា បន្ទាប់ពីវិលត្រឡប់មកកាន់សិល្បៈជាថ្មីនោះ រយៈពេលចុងក្រោយនេះ លោកកាន់តែទទួលបានប្រជាប្រិយភាព និង មានទីផ្សារការងារសិល្បៈជាហូរហែ។

យ៉ាងណាមិញ ថ្មីៗនេះ ឌីជេ ក្តិប បានធ្វើឱ្យមហាជនរំភើបចិត្តយ៉ាងខ្លាំងក្នុងនាមជាអ្នកគាំទ្រ ដែលបានឃើញ Idol បានបង្ហាញវត្តមានធ្វើជា គណៈកម្មការក្នុងកម្មវិធីប្រកួតចម្រៀងរ៉េបថ្មីសន្លាង The Next Level: Rapstar របស់ផលិតកម្មបារមី ជាមួយនឹងតារាចម្រៀងរ៉េប វណ្ណដា ព្រមទាំងតារាចម្រៀងរ៉េបស្រករក្រោយជាច្រើនរូបទៀត។

ក្រោយពីមានឱកាសបង្ហាញខ្លួនក្នុងការងារជាថ្មីលើវិថីសិល្បៈ ជាពិសេស បានរួមការងារនឹងលោក វណ្ណដា ព្រមទាំងសិល្បកររបស់ផលិតកម្មបារមីមួយរយៈ ឌីជេ ក្តិប បានបង្ហើបថាខ្លួន ហាក់រកឃើញខ្លួនឯងពីមុនជាថ្មីលើវិស័យ Hip Hop រហូតចង់និពន្ធចម្រៀងរ៉េបជាថ្មី។

ក្នុងនោះដែរ ឌីជេ ក្តិប ក៏បានរៀបរាប់ថា៖ «នៅក្បែរប្អូនៗរយៈនេះ មានអារម្មណ៍ថា ខ្ញុំក្មេងជាងមុន ចេះចង់សរសេរបទ Rap ឡើងវិញ។ ហិហិ! សំខាន់ គឺអាច Freestyle បានតិចៗឡើងវិញទៀត។ អរគុណណាស់! ប្អូនៗ ដែលបានពាំនាំអារម្មណ៍បងឱ្យត្រលប់ទៅរក ហុិបហប់ ដូចកាលពីបងនៅក្មេង ២០ ឆ្នាំមុនអុីចឹង (ឡូយអស់ទាស់ហ្មង)»៕