បុរសជាអ្នកទេសចរម្នាក់ ប្រឈមមុខនឹងការផាកពិន័យជាសាច់ប្រាក់រហូតដល់ ២២៤ ៥០០ ដុល្លារ ក្រោយរូបលោកបានលើកដុំថ្មធំមួយរួចបោះទម្លាក់ចុះចូលជ្រលងភ្នំនៅទីតាំងទេសចរណ៍ដ៏ល្បីល្បាញមួយក្នុងប្រទេសអេស្ប៉ាញ។
តាមការចេញផ្សាយដោយ 9GAG ករណីខាងលើនេះដែរបានកើតឡើងនៅទីតាំងឧទ្យានជាតិ Picos de Europa ដែលស្ថិតនៅភាគខាងជើងប្រទេសអេស្ប៉ាញ។ តាមរយៈវីដេអូដែលបានបង្ហោះបានបង្ហាញឱ្យឃើញ បុរសវ័យក្មេងម្នាក់កំពុងលើកដុំថ្មដ៏ធំមួយមុនធ្វើការបោះទម្លាក់ចុះទៅជ្រលងភ្នំខាងក្រោមជាមួយនឹងការសើចយ៉ាងសប្បាយរីករាយ។
ក្រោយវីដេអូមួយនោះផ្ទុះការចែកចាយខ្លាំង ខាង Civil Guard ក៏បានចាត់វិធានការស៊ើបអង្កេតលើករណីនេះភ្លាមៗ ដោយខាងអ្នកនាំពាក្យម្នាក់បានព្រមានថា៖ «ទង្វើមួយនេះអាចធ្វើឱ្យគេខាតបង់ប្រាក់ច្រើន។ ការបោះដុំថ្មចោលទៅជ្រលងភ្នំនេះអាចធ្វើឱ្យជនបង្ករងការពិន័យជាសាច់ប្រាក់ចន្លោះពី ៥៦០០ ដុល្លារដល់ ២២៤ ៥០០ដុល្លារ ព្រោះថាទង្វើបង្កការរំខានដល់បរិស្ថាននៅឧទ្យានជាតិ Picos de Europa គឺចាត់ទុកជាបទល្មើសធ្ងន់ធ្ងរ។ ត្រូវចាំទុកក្នុងខួរក្បាលណាពេលដែលទៅកម្សាន្តនៅឧទ្យានជាតិដែលជាតំបន់ការពារពិសេសដោយសារតម្លៃបរិស្ថាននៃទីតាំងនោះគឺខ្ពស់ណាស់»៕
