ដឹងរឿងកាន់តែក្តុកក្តួល! បងស្រី RuthKo សុខចិត្តបោះបង់ជំនាញ មករស់នៅជុំគ្រួសារ បានតែ ២ សប្តាហ៍ប្អូនប្រុសចាកចេញគ្មានថ្ងៃត្រឡប់

ធ្មេចបើកៗរយៈពេលជិត ១ ឆ្នាំហើយ ដែលតារាចម្រៀងមានប្រជាប្រិយភាព លោក RuthKo បានលាចាកលោកក្នុងគ្រោះថ្នាក់ចរាចរណ៍លាក្រុមគ្រួសារ មិត្តភក្តិ និង អ្នកគាំទ្រយ៉ាងអាឡោះអាល័យ កាលពីយប់រំលងអធ្រាត្រថ្ងៃទី ៦ ខែមករា ឆ្នាំ ២០២៥ កន្លងទៅ។

កន្លងមក មហាជនច្បាស់ជាបានជ្រាបហើយកាលលោក RuthKo នៅមានជីវិត គឺរស់នៅឆ្ងាយគ្នាពីបងស្រី ហើយលោកទើបតែបានរស់នៅជុំបងស្រីបង្កើតមិនបានប៉ុន្មាន ស្រាប់តែត្រូវចាកចោលគ្មានថ្ងៃត្រឡប់ទៅវិញ។

ជាក់ស្តែង នៅថ្ងៃទី ២៧ ខែតុលា ឆ្នាំ ២០២៥ កន្លងទៅ បងស្រីបង្កើតលោក RuthKo បានទម្លាយពីអារម្មណ៍ដ៏ឈឺចាប់របស់ខ្លួន ដែលបានបោះបង់អាជីព វិលត្រលប់មករស់នៅជុំប្អូនប្រុសវិញ ប៉ុន្តែរស់នៅជុំគ្នាបានត្រឹម ២ សប្តាហ៍ បែរជាប្អូនប្រុសត្រូវស្លាប់ចោល។

ក្នុងនោះ បងស្រីលោក RuthKo បានរៀបរាប់ថា៖ ««មិនអីទេ ខ្ញុំយល់អារម្មណ៍មួយហ្នឹង» អត់ទេ! អ្នកមិនអាចយល់អារម្មណ៍មួយនេះបានទេ ដរាបណាអ្នកមិនធ្លាប់ជួបហេតុការណ៍នេះដោយផ្ទាល់។ អ្នកអាចយល់អារម្មណ៍ឈឺចាប់ តែអ្នកមិនអាចយល់ទេ ថាតើការឈឺចាប់មួយនេះវាមានជម្រៅជ្រៅប៉ុនណា។ អ្នករឹតតែមិនអាចយល់អារម្មណ៍មួយ ដែលខំស្រវេស្រវាបោះបង់ចោលអាជីពជំនាញ ផ្លាស់ប្តូរខ្សែជីវិត ៣៦០ ឌឺក្រេ ដើម្បីបានមកនៅជួបជុំបងប្អូនម៉ែឪ និង អាចបានឃើញមុខគ្នារាល់ថ្ងៃ ដល់មកដល់បាន ២ អាទិត្យមិនទាន់បានជួបមុខប្អូនស្រួលបួលផងប្អូនស្លាប់ចោល។

«គម្រោងមកនៅជុំគ្នាតែបែរជាមកអុជភ្លើងបូជាប្អូនខ្លួនឯងវិញ» អ្នកសាកស្រមៃមើលៗ! ពេលខ្ញុំឆ្កួតម្តងៗ ពេលខ្ញុំនឹកឃើញថា «ប្អូនអញស្លាប់បាត់ហើយ» ម្តងៗ ខ្ញុំប្រកាច់ស្រែកយំដូចមនុស្សឆ្កួត ហៅប្អូនមកវិញ អ្នកយល់អារម្មណ៍ហ្នឹងទេ? មានមនុស្សតិចណាស់ ដែលបានឃើញរូបភាពអស់ហ្នឹង ព្រោះមិនដែលចង់ឱ្យអ្នកណាឃើញទេ ខ្លាចគេថាយើងទន់ជ្រាយ។ តែប្អូនខ្ញុំនៅសុខៗស្លាប់ចោលខ្ញុំបាត់ ឱ្យខ្ញុំទទួលយកបែបណា? បើគ្នានៅស្អាតល្អ មាំទាំសុខៗហ្នឹង? ២៥ ឆ្នាំក្នុងគ្រួសារតែមួយ និយាយគ្នាទៅមកសុខៗក៏រលាយបាត់សូន្យ អ្នកមិនអាចយល់អារម្មណ៍ហ្នឹងទេ។ ដំបៅនេះ គ្មានថ្ងៃជាហើយគ្មានថ្នាំព្យាបាលទេ មានតែប្រើពេលវេលា។ យូរប៉ុនណាក៏មិនដឹង។ រូបភាពទាំងអស់ពីថ្ងៃនោះ នៅដក់ក្នុងខួរក្បាលខ្ញុំច្រើនណាស់ អត់មានបាត់មួយ detail ណាទេ»៕