នៅថ្ងៃទី ២៩ ខែមេសា ឆ្នាំ ២០២៥ នេះ ក្រសួងធនធានទឹក និង ឧតុនិយម បានចេញសេចក្តីជូនដំណឹង ស្តីពីការព្យាករណ៍អាកាសធាតុលើកទី ១ សម្រាប់រដូវវស្សា ចាប់ពីខែឧសភា ដល់ខែតុលា ឆ្នាំ ២០២៥។
ក្នុងនោះ បន្ទាប់ពីធ្វើការតាមដាន និង ព្យាករណ៍ស្ថានភាពអាកាសធាតុ ក្រសួងធនធានទឹក និងឧតុនិយម បានបញ្ចាក់ពីស្ថានភាពអាកាសធាតុនៅក្នុងរដូវវស្សា ឆ្នាំ ២០២៥ ដែលមានលក្ខណៈដូចខាងក្រោម៖
១. បាតុភូតសកល៖ យោងលើការព្យាករស្តីពីស្ថានភាពវិវត្តន៍នៃសីតុណ្ហភាព នៅលើផ្ទៃមហាសមុទ្រប៉ាស៊ីហ្វិកខាងលិច មហាសមុទ្រឥណ្ឌា និង តំបន់អេក្វាទ័របង្ហាញឱ្យឃើញថា ចាប់ពីខែឧសភា បាតុភូតឡានីញ៉ា (La Niña) នឹងថយចុះមកត្រឹម ១០% ហើយបាតុភូតអែនសូ (ENSO-Neutral) ឡើងដល់ ៨០%។
២. រដូវវស្សា៖ រដូវវស្សាអាចនឹងចាប់ផ្តើមនៅក្នុងសប្តាហ៍ទី ១ នៃខែឧសភា ឆ្នាំ ២០២៥ ដែលលឿនជាងឆ្នាំ ២០២៤។ សីតុណ្ហភាពមធ្យមអប្បបរមា ២៥°C និង អតិបរមា ៣៦°C ទាបជាងសីតុណ្ហភាពមធ្យមភាគច្រើនឆ្នាំ និង ទាបជាងឆ្នាំ ២០២៤។
២.១. ដើមរដូវវស្សា សីតុណ្ហភាពមធ្យមអប្បបរមា និង អតិបរមា ទាបជាងមធ្យមភាគច្រើនឆ្នាំ។ បរិមាណទឹកភ្លៀងនៅខែឧសភា ដល់ខែមិថុនា មានកម្រិតខ្ពស់ជាងមធ្យមភាគច្រើនឆ្នាំ។ បរិមាណទឹកភ្លៀង មានពីមធ្យម ទៅច្រើន ហើយបាតុភូតផ្គរ រន្ទះ និង ខ្យល់កន្ត្រាក់អាចកើតឡើងច្រើន។
២.២. ពាក់កណ្តាលរដូវវស្សា សីតុណ្ហភាពមធ្យមអប្បបរមា និង អតិបរមា ទាបជាងមធ្យមភាគច្រើនឆ្នាំ។ បរិមាណទឹកភ្លៀងនៅខែកក្កដា ដល់ខែសីហា មានកម្រិតខ្ពស់ជាងមធ្យមភាគច្រើនឆ្នាំ។
២.៣. ចុងរដូវវស្សា សីតុណ្ហភាពមធ្យមអប្បបរមា និង អតិបរមា ទាបជាងមធ្យមភាគច្រើនឆ្នាំ។ បរិមាណទឹកភ្លៀងនៅខែកញ្ញា ដល់ខែតុលា មានកម្រិតខ្ពស់ជាង ឬ ប្រហាក់ប្រហែលនឹងមធ្យមភាគច្រើនឆ្នាំ។
សរុបមក ក្រសួងបានឱ្យដឹងថា រដូវវស្សាឆ្នាំ ២០២៥ សីតុណ្ហភាពមធ្យមអប្បបរមា ២៥°C និង អតិបរមា ៣៦°C ទាបជាងសីតុណ្ហភាព មធ្យមភាគច្រើនឆ្នាំ និង ទាបជាងឆ្នាំ ២០២៤។ ក្នុងនោះ បរិមាណទឹកភ្លៀងខ្ពស់ជាងមធ្យមភាគច្រើនឆ្នាំ ជាមួយនឹងរបាយទឹកភ្លៀងធ្លាក់រាយប៉ាយបានល្អជាងឆ្នាំ ២០២៤ ហើយបាតុភូតផ្គរ រន្ទះ និង ខ្យល់កន្ត្រាក់អាចកើតឡើងច្រើន៕
សូមអានសេចក្ដីលម្អិតនៅខាងក្រោម ៖
