កាលពីថ្ងៃទី ២១ ខែមេសា ឆ្នាំ ២០២៥ កន្លងទៅនេះ បុរសជនជាតិមីយ៉ាន់យ៉ា ដែលជាកម្មករម្នាក់បានរួចជីវិតពីក្នុងការបាក់រលំអគារនៅប្រទេសថៃ ដោយសារតែការរញ្ជួយដីកន្លងទៅ បានទម្លាយពីហេតុការណ៍ខណៈកើតហេតុគួរឱ្យរន្ធត់ និង អាណិតជាពន់ពេក។
បុរសរូបនេះបានរៀបរាប់ឱ្យដឹងថា ខណៈពេលកើតហេតុខ្លួនកំពុងតែធ្វើការនៅជាន់ទី ២៨ ឯណោះ ពេលនោះក៏បានគិតក្នុងចិត្តថាខ្លួនប្រាកដជាមិនរស់ឡើយ។ ក្នុងនោះត្រឹមតែមួយវិនាទីប៉ុណ្ណោះ អគារក៏បានរលំចុះមកគួរឱ្យរន្ធត់ ខ្លួនក៏ព្យាយាមបើកភ្នែកមើលគ្រប់យ៉ាងតែមើលមិនឃើញអ្វីសោះ ព្រោះសុទ្ធតែដីធូលីហ៊ុយពាសពេញ តែអ្វីដែលសប្បាយចិត្តនោះ គឺដឹងថាខ្លួននៅមានជីវិតនៅឡើយ។
បុរសរូបនេះបានឱ្យដឹងទៀតថា នៅពេលកើតហេតុ នៅជាន់ទី ២៨ នោះមានកម្មករធ្វើការជាមួយគ្នាចំនួន ៤ នាក់ ដោយ ២ នាក់ទៀតបានស្លាប់ នៅរស់តែខ្លួនជាមួយនឹងមិត្តភក្តិម្នាក់ទៀតប៉ុណ្ណោះ។ នៅពេលដែលអគារចាប់ផ្តើមរង្គើ ខ្លួនបានប្រាប់មិត្តភក្តិថាកុំឱ្យរត់ តែពួកគេ ២ នាក់បាននាំគ្នារត់ ទើបស្លាប់បាត់បង់ជីវិត រីឯខ្លួន និងមិត្តម្នាក់ទៀតនាំគ្នានៅស្ងៀមទើបរួចជីវិតបាន៕
ប្រភព៖ Kapook
