ជីវិតឃ្លេងឃ្លោងដូចជិះលើទូក! យឿន ពិសី ចេញមុខលាតត្រដាងរឿងពិត ចូលសិល្បៈ ១០ ឆ្នាំហើយ នៅតែគ្មានលុយឡានហ៊ឺហានឹងគេ

កន្លងមក មហាជននិយមតាមដាន ជីវិតការងារ និង ឯកជនរបស់ម្ចាស់ជ័យលាភី Cambodia’s Got Talent រដូវកាលទី ១ លោក យឿន ពិសី ច្បាស់ជាបានជ្រាបមកហើយ នូវភាពឡើងចុះនៃជីវភាពរបស់លោក ដោយពេលខ្លះធូរធារ និង ពេលខ្លះក៏ជួបបញ្ហាដែរ។

ដោយឡែក អ្វីដែលធ្វើឱ្យមហាជនចាប់អារម្មណ៍ជាថ្មី គឺលោក យឿន ពិសី បានបង្ហោះសារ ប្រាប់ថា ឈប់សួរនាំរឿងលោកហេតុអ្វីចូលសិល្បៈយូរហើយ នៅតែក្រទៀត។

ក្នុងនោះ លោក យឿន ពិសី បានរៀបរាប់ថា៖ «ខ្ញុំមិនតូចចិត្តទេពុកម៉ែបងប្អូន ព្រោះខ្ញុំរស់នៅក្នុងសង្គមដែលគេលំអៀងចំពោះរូបខ្ញុំយូរណាស់មកហើយ។ ពេលខ្លះការងារគេ ក៏ដូចខ្ញុំ ការងារខ្ញុំក៏ដូចគេ ប៉ុន្តែចំពោះតម្លៃវាមិនដូចគ្នាទេ ឱកាសដែលគេផ្ដល់ឱ្យខ្ញុំក៏មិនដូចគ្នាដែរ គេបានឡើងឆាក ១០ ដង ខ្ញុំវិញបានត្រឹមម្ដងអស់ច្រើនហើយ។ គេបាន ២៥០$ ខ្ញុំបានអស់ច្រើនហើយត្រឹម ១៥០$ គេចូលសិល្បៈត្រឹម ៥ ឆ្នាំគេមានផ្ទះនៅ គេបានឡានជិះ តែខ្ញុំចូលសិល្បៈ ១០ ឆ្នាំ ពេលទៅច្រៀងបានជិះត្រឹមកង់បី ឬឡានឈ្នួលអីអស់ហើយ។

ពេលបងប្អូនជួបខ្ញុំនៅខាងក្រៅ មិនបាច់សួរខ្ញុំថា ហេតុអ្វីបានជាខ្ញុំចូលសិល្បៈយូរហើយ នៅតែក្រដដែលចឹង? សំណេរនៅខាងលើ ដែលបងប្អូនពុកម៉ែបានអានមុននេះហើយ ជាពាក្យក្នុងចិត្ត និងជារឿងពិតរបស់ខ្ញុំ។ ជាចុងក្រោយខ្ញុំ យឿន ពិសី សូមអរគុណបងប្អូនពុកម៉ែដែលបានគាំទ្រ»៕