ជារឿងដ៏គួរឱ្យរំភើបភ្ញាក់ផ្អើល និង នឹកស្មានមិនដល់ នៅថ្ងៃទី ១១ ខែវិច្ឆិកា ឆ្នាំ ២០២៥ កន្លងទៅនេះ ក្រសួងទេសចរណ៍ បានបញ្ជាក់ឱ្យដឹងពីរឿងរ៉ាវ ជនបរទេសមួយរូប បានមកប្រទេសកម្ពុជាដោយក្ដីអស់សង្ឃឹម និង ចង់បោះបង់ជីវិតខ្លួនឯងចោល ប៉ុន្ដែនៅពេលដែលបានមករស់នៅកម្ពុជា ធ្វើឱ្យលោកភ្លឺភ្នែក ជាប់ចិត្ត និង ទទួលបាននូវពន្លឺជីវិតថ្មី លើដែនដីកម្ពុជា។
ជាក់ស្ដែង តាមរយៈជនបរទេសដែលមានគណនីហ្វេសប៊ុកឈ្មោះ Bong Ah Run បានរៀបរាប់រឿងរ៉ាវរបស់លោកនៅកម្ពុជាឱ្យដឹងថា ៖ «ពួកគេមិនព្រមឱ្យខ្ញុំបោះបង់ខ្លួនឯងនោះទេ! ខ្ញុំមិនបានមកប្រទេសកម្ពុជា ដើម្បីស្វែងរកជីវិតអ្វីនោះទេ ខ្ញុំមកទីនេះដើម្បីបញ្ចប់ជីវិត។ ប៉ុន្តែទីកន្លែងមួយនេះ មិនព្រមឱ្យខ្ញុំធ្លាក់ខ្លួនក្នុងសភាពនោះទេ។ អំពើល្អរបស់ប្រជាជនកម្ពុជា ជាសន្ដិភាពស្ងប់សុខរបស់ខ្ញុំនៅទីនេះ ធ្វើឱ្យខ្ញុំជាប់ចិត្ត ហើយបានព្យាបាល និង កសាងខ្ញុំឡើងវិញ ដែលផ្ទុយស្រឡះពីផ្ទះស្រុកកំណើតរបស់ខ្ញុំ ដែលសុវត្ថិភាព គឺត្រឹមជាក្ដីសុបិនប៉ុណ្ណោះ។ ប៉ុន្តែនៅទីនេះ(កម្ពុជា) វាជាការពិត វាជាស្នាមញញឹម ជាចង្វាក់បេះដូង ជាការគោរពឱនលំទោន។ កម្ពុជាមិនត្រឹមតែបានផ្ដល់ជីវិតមកខ្ញុំម្ដងទៀតនោះទេ តែកម្ពុជាផ្ដល់ឱ្យខ្ញុំនូវផ្ទះដ៏កក់ក្ដៅ»។
តាមរយៈពាក្យសម្ដីចេញពីចិត្តរបស់ជនបរទេសដែលស្ទើរតែបោះបង់ខ្លួនឯង ប្រែជាបុគ្គលម្នាក់ដែលបានកសាងខ្លួនឯងឡើងវិញបាននៅប្រទេសកម្ពុជា គឺពិតជាបានបញ្ជាក់ឱ្យឃើញពីឥទ្ធិពលនៃភាពវិជ្ជមានរបស់ប្រទេសកម្ពុជា ដែលយើងមានសន្ដិភាព ប្រជាជនស្លូតត្រង់ វប្បធម៌អស្ចារ្យ និង ស្នាមញញឹម ដែលតែងតែធ្វើឱ្យទេសចរណ៍ដែលមកលេងហើយគឺជាប់ចិត្តមិនអាចប្រកែកបានឡើយ៕
