ចេះតែរអ៊ូរឿងចៅហ្វាយប្រាប់ឆ្មាញឹកញាប់ ថ្ងៃមួយចៅហ្វាយមកលេងផ្ទះ មានអីឆ្មាជួយបញ្ចេញកំហឹងជំនួសម្ចាស់ ក្នុងសកម្មភាពស្មានមិនដល់

ថ្មីៗនេះ មាននារីជនជាតិចិនម្នាក់ បានទម្លាយរឿងរ៉ាវដ៏គួរឱ្យអស់សំណើច លាយឡំនឹងការហួសចិត្តមួយរបស់សត្វឆ្មារបស់នាង ដែលចេះគុំគួនសងសឹកជំនួសម្ចាស់យ៉ាងមិនគួរឱ្យជឿ។

នាងបានរៀបរាប់ឱ្យដឹងថា នៅពេលដែលត្រឡប់មកពីធ្វើការវិញ នាងតែងតែរអ៊ូរទាំរឿងចៅហ្វាយនាយឱ្យឆ្មារបស់នាងស្តាប់ជាប្រចាំ​ ហើយនាងមិននឹកស្មានសោះ ថាវាពិតជាយល់ពីអ្វីដែលនាងនិយាយទាំងអស់។ ជាក់ស្តែងនៅថ្ងៃមួយ ក្រោយពីមានការជប់លៀងនៅក្រុមហ៊ុនហើយ ចៅហ្វាយក៏បានមកលេងផ្ទះនាង ហើយស្រាប់តែសត្វឆ្មារបស់នាង ក៏សម្តែងការមិនពេញចិត្ត ដោយគ្រហឹមគំរាម ហើយថែមទាំងលោតទៅយកជើងធាក់មុខចៅហ្វាយនាងទៀតផង មើលទៅដូចជាបានគុំគួន និងសងសឹកជំនួសនាងដូច្នោះឯង។

នាងបានបន្តទៀតថា ឆ្មារបស់នាងហាក់ចេះដឹងយ៉ាងចម្លែក សូម្បីតែពេលនាងថាវាមុខអាក្រក់ក៏វាសម្តែងការមិនពេញចិត្តដែរ។ នាងសន្និដ្ឋានថា សត្វឆ្មាមានសមត្ថភាពពិសេសក្នុងការយល់ពីអារម្មណ៍របស់ម្ចាស់វា វាមិនអាចនិយាយឆ្លើយតប តែវាអាចចងចាំ និងមានប្រតិកម្មការពារម្ចាស់ដោយមិនដឹងខ្លួន៕

ប្រភព៖ Mirror Media