ចូលហាងញ៉ាំអី ដល់កូនឈឺនោមប្រាប់ឱ្យនោមដាក់កែវទឹក រួចទុកចោលលើតុ ជះក្លិនដល់អ្នកក្បែរនោះរកហូបចុកលែងឆ្ងាញ់

ថ្មីៗនេះ មានរឿងរ៉ាវដ៏គួរឱ្យហួសចិត្តមួយបានកើតមានឡើងនៅប្រទេសចិន ដោយមានក្មេងប្រុសអាយុ ២ ឆ្នាំម្នាក់បានឈរនោមដាក់ក្នុងកែវទឹកនាភោជនីយដ្ឋានមួយកន្លែង ហើយអ្វីរឹតតែធ្វើឱ្យគាំងជាងនេះទៅទៀតនោះគឺម្ដាយរបស់ក្មេងថែមចេញមកការពារកូនខ្លួនថា «មកពីក្មេងទប់លែងជាប់»។

រឿងរ៉ាវនេះដែរត្រូវបានទម្លាយដោយសាក្សីជាភ្ញៀវក្នុងហាងម្នាក់ត្រកូល Tang ប្រាប់សារព័ត៌មាន The Cover ដោយនាងបានរៀបរាប់ថាហេតុការណ៍នោះកើតឡើងនៅភោជនីយដ្ឋាន Fuyuanju ក្នុងក្រុង Hangzhou ខេត្ត Zhejiang។ Tang រួមជាមួយមិត្តភក្តិរបស់នាងបានទៅញ៉ាំអីនៅហាងនោះកាលពីថ្ងៃទី ១៣ ខែមីនា ឆ្នាំ ២០២៥ កន្លងទៅ ដោយនាងបានឃើញក្មេងតូចម្នាក់នៅតុក្បែរនាងបានងើបឈរឡើងរួចទាញខោចុះក្រោម រួចឈរនោមដាក់ក្នុងកែវទឹកដែលគេដាក់សម្រាប់ឱ្យភ្ញៀវផឹក។

Tang បានបន្តទៀតថា ក្មេងប្រុសនោះមកហាងជាមួយម្ដាយ និង សាច់ញាត់ចាស់ៗ ២ នាក់ផ្សេងទៀត។ ពេលដែលក្មេងប្រុសនិយាយថារូបគេឈឺជុះនោម ក៏មានសាច់ញាតិគេម្នាក់និយាយថាឱ្យទៅយកធុងសំរាមមកឱ្យគេនោមដាក់ក្នុងនោះទៅ ប៉ុន្តែម្ដាយរបស់ក្មេងក៏និយាយតបថា «ឱ្យគេនោមក្នុងកែវនោះតែម្ដងទៅ»។

អ្វីដែលធ្វើឱ្យ Tang កាន់តែក្ដៅស្លឹកត្រចៀកនោះគឺពេលដែលក្មេងឈរនោមនោះគ្មានបុគ្គលិកហាងណាម្នាក់ចេញមកនិយាយហាមឃាត់អ្វីឡើយ។ ទឹកនោមក្នុងកែវក៏ទុកចោលនៅតុគ្មាននរណាយកចោលឡើយ ហើយតុរបស់នាងនៅក្បែរគ្នាផងនោះ នាង និង មិត្តភក្តិមិនអាចទ្រាំនឹងក្លិនទឹកនោមនោះបានឡើយទើបពួកគេសម្រេចទៅសួរខាងបុគ្គលិកហាងឱ្យដោះស្រាយលើបញ្ហានេះ។

Tang បាននិយាយជាមួយម្ចាស់ហាង ដោយរូបនាងសុំឱ្យមានការ discount ឬផ្លែឈើឥតគិតថ្លៃខ្លះទុកជាការសុំទោសពីខាងហាង ប៉ុន្តែម្ចាស់ហាងបដិសេធមិនព្រមនោះឡើយ និង ថែមចោទប្រកាន់ Tang ថាជាមនុស្សនាំរឿងទៀតផង។ ក្រោយនិយាយមិនត្រូវរ៉ូវគ្នា Tang ក៏បានចេញពីហាងក្រោយបង់ថ្លៃអាហារចំនួន ៣១៦ យ័ន (៤៤ ដុល្លារ)។

យ៉ាងណាមិញ ដោយសារតែរឿងមួយនេះក្លាយជាប្រធានបទក្ដៅ ខាងអាជ្ញាធរត្រួតពិនិត្យផ្សារក្នុងតំបន់ក៏បានចាប់ផ្ដើមស៊ើបអង្កេតលើរឿងនេះ ហើយក៏រកឃើញថាខាងបុគ្គលិកបានធ្វើការបោះចោលកែវទឹកដែលក្មេងនោមដាក់នោះហើយ ដោយក្រោយមកខាងហាងក៏ព្រមធ្វើការសុំទោសទៅ Tang រួមទាំងសងសំណងនាងវិញបន្ថែមចំនួន ១០០០ យ័ន (១៤០ ដុល្លារ)។ Tang ព្រមទទួលការសុំទោស ប៉ុន្តែនាងមិនយកលុយសងជំងឺចិត្តនោះឡើយ៕

ប្រភព៖ SCMP