ឈានមកដល់វ័យ ៣០ ឆ្នាំ អ្នកធ្វើការទូទៅនឹងពោរពេញទៅដោយបទពិសោធ តែយ៉ាងណាឈានមកដល់វ័យនេះ ភាពតានតឹង អារម្មណ៍នឿយណាយ ក៏ចាប់ផ្តើមកើតឡើងជាបណ្តើរៗ ដែលហាក់ខុសប្លែកកាលចាប់ផ្តើមធ្វើការដំបូង ដែលអារម្មណ៍ និង ស្មារតីប្រកបដោយថាមពល និង ភាពពុះកញ្ជ្រោល។ ដើម្បីស្តារឱ្យសកម្មឡើងវិញ ដូចកាលវ័យ ២០ ឆ្នាំ អ្នកអាចអនុវត្តតាមវិធីចំនួន ៤ ដូចជា៖
១. ផ្តោតទៅលើសុខភាព និង លំហាត់ប្រាណ
ធ្វើលំហាត់ប្រាណជាប្រចាំ រក្សាតុល្យភាពសារធាតុចិញ្ចឹម និង គេងឱ្យបានគ្រប់គ្រាន់ ដើម្បីពង្រឹងសុខភាពផ្លូវកាយ និង ផ្លូវចិត្ត ដែលទាំងនេះ វាជួយជំរុញដល់ការធ្វើការឱ្យមានប្រសិទ្ធភាព។ ដើម្បីអនុវត្តបាន អ្នកត្រូវផ្សារភ្ជាប់ខ្លួនជាមួយការដាក់កាលវិភាគហាត់ប្រាណប្រចាំសប្តាហ៍ ឬមានគ្រូបង្វឹកដើម្បីជួយណែនាំ តាមដាន និង ជំរុញ។ មួយវិញទៀត ត្រូវកំណត់របបអាហារដែលជួយដល់ខួរក្បាល ដូចជាអាហារសម្បូរទៅដោយ អូមេហ្គា ៣ (Omega-3) និង សារធាតុប្រឆាំងអុកស៊ីតកម្ម ជាដើម។
២. រៀនអ្វីថ្មីបន្ថែម
បើមិនរៀនអ្វីថ្មី ការគិតរបស់អ្នកនឹងនៅទ្រឹងមួយកន្លែង ឬនិយាយអាក្រក់ស្តាប់ប្រៀបបានកង្កែបក្នុងអណ្តូង។ សម័យឌីជីថល ការធ្វើការត្រូវតែអភិវឌ្ឍន៍ខ្លួនទៅតាមភាពជឿនលឿនរបស់សម័យទំនើប។ សាកល្បងរៀនអ្វីដែលថ្មីនៅក្នុងវិស័យការងារដែលអ្នកកំពុងធ្វើ ដូចជាជំនាញបច្ចេកវិទ្យាផ្សេងៗ យុទ្ធសាស្ត្រទីផ្សារ ឬរបៀបរកស៊ីប្លែកៗជាដើម។ ដើម្បីផ្សារភ្ជាប់ខ្លួនទៅចំណុចនេះបាន អ្នកអាចចូលសិក្សាវគ្គខ្លីអនឡាញ ចូលរួមសិក្ខាសាលា ឬអានព័ត៌មានថ្មីៗទាក់ទងនឹងការងារដែលអ្នកកំពុងធ្វើ។
៣. បង្កើតបណ្តាញ និង ជំនាញទំនាក់ទំនង
ការអភិវឌ្ឍន៍ទំនាក់ទំនងខ្លាំងជាមួយក្រុមការងារ និង អតិថិជន អាចជាឱកាសសម្រាប់ការសហការ និង ភាពរីកចម្រើនអាជីព។ ការទំនាក់ទំនងគឺជាផ្នែកមួយដ៏សំខាន់សម្រាប់ការរក្សាភាពវិជ្ជាជីវៈ។ ដូចនេះ គប្បីរក្សាការបង្កើតបណ្តាញទំនាក់ទំនងនៅក្នុងសង្គម ដោយចូលរួមព្រឹត្តិការណ៍សំខាន់ៗ ទន្ទឹមគ្នានឹងពង្រឹងជំនាញស្តាប់ និង ជំនាញនិយាយ ដើម្បីបញ្ចេញគំនិត និង យល់ពីអ្នកដទៃប្រកបដោយប្រសិទ្ធភាព។
៤. បែងចែកការងារ និង គ្រប់គ្រងស្ត្រេស
ការចេះគ្រប់គ្រងឬបែងចែកពេលវេលាចំពោះការងារបានល្អ វាអាចកាត់បន្ថយភាពនឿយណាយ និង ជំរុញការលើកទឹកចិត្តខ្លួនឯងឡើងវិញ។ និយាយឱ្យស្រួលស្តាប់ អ្នកដែលធ្វើការប្រកបដោយប្រសិទ្ធភាព គេដឹងពេលណាគួរធ្វើការងារ និង ពេលណាគួរសាកថ្មជីវិត។ សម្រាកខ្លះ កំណត់ព្រំដែន និង អនុវត្តតិចនិចបន្ធូរអារម្មណ៍ ដើម្បីកាត់បន្ថយស្ត្រេស ក៏ដូចជារក្សាផលិតភាពឱ្យមានគុណភាពខ្ពស់៕
