ការជួបជុំមានពិសាគ្រឿងស្រវឹង មិនថាជាមិត្តភក្តិ ឬ ក្រុមការងារ វានឹងបង្កើតជាបរិយាកាសរីករាយ ក៏ដូចជាភាពស្និទ្ធស្នាល។ «ពិសាដោយការទទួលខុសត្រូវ» ជាពាក្យត្រូវទន្ទេញជាប់នៅក្នុងចិត្ត ហើយបើចង់ពិសាដោយរីករាយ មិននាំរឿង មិននាំទុក្ខដាក់ខ្លួន ជាពិសេសគេហៅរាប់បានយូរ អ្នកគប្បីប្រកាន់ខ្ជាប់ ៥ ចំណុចដូចខាងក្រោម៖
១. ផឹកដឹងកម្រិតខ្លួនឯង
កាលណាផឹកច្រើនជ្រុល អាចធ្វើឱ្យភ្លេចខ្លួន បញ្ចេញអាកប្បកិរិយាមិនសមរម្យដូចជា កាយវិការខ្មាសអៀន កោងកាច ឬ ស្រវឹងបាក់ស្បាតជាដើម។ បើមិនចង់ឃើញខ្លួនឯងក្នុងរូបភាពបែបនេះ គួរផឹកល្មមៗ ឧស្សាហ៍ផឹកទឹក និង ដឹងកម្រិតខ្លួនពេលណាត្រូវឈប់។
២. ជៀសវាងនិយាយដើម
ភាគច្រើននៅពេលសុរាចូលខ្លួន ម្នាក់ៗច្រើនតែមាត់រអិល និយាយដើមគេពីមួយចូលមួយ មិនចេះចប់។ បើមិនប្រយ័ត្ន អាចជ្រុលពាក្យសម្តី ជួនម្ចាស់ដើមតាមទាន់ ឬ ជួនម្នាក់ក្នុងក្រុមអាចជាខ្សែរយៈធ្វើឱ្យហានិភ័យបាន។
៣. ធ្វើជាមនុស្សពូកែស្តាប់ និង ស្របតាម
ការជួបជុំផឹក តែងតែបង្កើតការសន្ទនា ហើយដើម្បីជៀសវាងបង្កបញ្ហាដូចបានរៀបរាប់នៅចំណុចទី ២ គួរធ្វើជាអ្នកស្តាប់ឱ្យបានច្រើន និង ស្របតាមគំនិតអ្នកនិយាយ។ អ្នកអាចបង្ហាញការចាប់អារម្មណ៍ទៅលើប្រធានបទ ដែលគេកំពុងនិយាយ និង ជៀសវាងការបញ្ចេញមតិបែបវាយប្រហារ ឌឺដង ឬអវិជ្ជមាន។
៤. កុំធ្វើមានតែឯង
ជួបជុំជាក្រុមមិនគួរបង្ហាញឫកពារើសអើង ឬ មិនរាប់នរណាម្នាក់ចូលជាក្រុម ព្រោះវាអាចបង្កើតភាពតានតឹង ខូចអារម្មណ៍ទាំងអស់គ្នា។ មិនថាការរើសអើងគ្នា សូម្បីអ្នកមិនពូកែផឹក ឬ មិនមានចំណូលចិត្តដូចអ្នក ក៏គប្បីយល់ពីគ្នាទៅវិញទៅមកផងដែរ។ ឧទាហរណ៍ បើគេមិនចូលចិត្តឬមិនចេះផឹកស្រាដែលអ្នកកំពុងផឹក អ្នកអាចណែនាំឱ្យគេមានជម្រើសផឹកស្រាផ្សេង ហើយដាក់ផឹកក្នុងវង់តែមួយជាមួយគ្នា។ ធ្វើដូចនេះ គេនឹងមានអារម្មណ៍កក់ក្តៅ និង មានអារម្មណ៍ត្រូវបានយល់ចិត្តប្រកបដោយការគោព។
៥. លាដោយចំណងមិត្តភាព
ពេលចាកចេញឬបំបែបគ្នាពីវង់ផឹក គប្បីនិយាយពាក្យលាគ្នាដោយភាពស្និទ្ធស្នាល។ អាចនិយាយពាក្យអរគុណសម្រាប់ការអញ្ជើញមក ឬអរគុណសម្រាប់ការបង្កើតការជួបជុំ ឬកុំភ្លេចណាត់ជួបគ្នាម្តងទៀត។ ជាពិសេស ពាក្យបារម្ភសុខទុក្ខគ្នាដូចជា ពេលទៅដល់ផ្ទះផ្តល់ដំណឹងផង ឬ ជិះទៅផ្ទះសុវត្ថិភាពជាដើម។ តែប៉ុន្មានម៉ាត់នេះ ជឿជាក់ថា អ្នកនឹងត្រូវបានគេនឹកឃើញ រាល់ពេលបង្កើតកម្មវិធីជួបជុំមិនខាន៕
