ចូលវង់ជល់កែវចូលចិត្តណាស់បង្ខំលើកដាច់ៗ? មោះ! មកដឹងកម្រិតផឹកកែវស្តង់ដារស្រួលតវ៉ា ព្រោះបុរសកម្រិតផ្សេង នារីកម្រិតផ្សេង

ពិសាដោយសារទទួលខុសត្រូវ នេះគឺជាពាក្យក្រើនរម្លឹកនៅពេលមានការជួបជុំទទួលទានគ្រឿងស្រវឹង។ ចំពោះសុខភាព បើពិសាត្រឹមកម្រិតសមល្មម វាមិនជាថ្វី តែបើពិសាលើសកម្រិត វានឹងបំផ្លាញយើងវិញមិនខាន។ ជាពិសេស វាប៉ះពាល់ដល់សុខភាពថ្លើម។

ជាក់ស្តែង តាមការរៀបរាប់របស់មន្ទីរពេទ្យកាល់ម៉ែត ដែលបង្ហោះនៅលើទំព័រហ្វេសប៊ុក បានលម្អិតយ៉ាងដូច្នេះថា៖ ការរលាកថ្លើមធ្ងន់ធ្ងរ ជាផលវិបាកគ្រោះថ្នាក់មួយនៃការទទួលទានសុរាលើសលប់ ដែលអ្នកជំងឺមានអត្រាស្លាប់លើសពី ៥០% ប្រសិនបើគ្មានការប្តូរសរីរាង្គថ្លើមជាបន្ទាន់នោះទេ!។

ជាទូទៅបរិមាណសុរាអាស្រ័យទៅនឹងចំនួន និង កម្រិតជាតិអាល់កុលរបស់សុរា ដែលយើងពិសា។ គេចាត់ការពិសាគ្រឿងស្រវឹងក្នុងចំនួនច្រើនលើសលប់គឺ ចាប់ពីបរិមាណលើសពី ៤ កែវស្តង់ដាក្នុងមួយថ្ងៃ ឬ ១៥ កែវស្តង់ដាក្នុងមួយសប្តាហ៍ចំពោះបុរស និង លើសពី ៣ កែវស្តង់ដាក្នុងមួយថ្ងៃ ឬ ៧ កែវស្តង់ដាក្នុងមួយសប្តាហ៍ចំពោះស្រ្តី ។

– ១ កែវស្តង់ដា ស្មើនឹង ៣៤០ ម.ល ប៊ីយែរ (អាល់កុល ៥ %)

– ១៥០ ម.ល ស្រាក្រហម (អាល់កុល ១២ %)

– ៤៥-៥០ ម.ល ស្រា whiskey (អាល់កុល ៤០-៤៥%)

ជំងឺរលាកថ្លើម ដែលបង្កឡើងដោយសុរា វាអាចលេចឡើងក្រោមរូបភាពជា ការរលាកថ្លើមស្រួចស្រាវ ការរលាកថ្លើមរ៉ាំរ៉ៃ និង ខ្លាញ់រុំថ្លើមផងដែរ។

រោគសញ្ញារបស់អ្នកជំងឺ ជាទូទៅមិនស្តែងចេញជាសញ្ញាអ្វីទាំងអស់ ដែលទាមទារឱ្យមកពិគ្រោះពិនិត្យជាមួយវេជ្ជបណ្ឌិត និង ពិនិត្យមើលឈាមអំពីមុខងារថ្លើមផ្សេងៗ និង សញ្ញានៃការរលាកថ្លើម។

នៅក្នុងករណីខ្លះ អ្នកជំងឺអាចស្តែងចេញជាសញ្ញា លឿងភ្នែក ទឹកនោមលឿងចាស់ខុសពីធម្មតា ចុកសៀតក្រោមឆ្អឹងជំនីខាងស្តាំ ឬរហូតដល់វង្វេងវង្វាន់ស្មារតី ឬរហូតដល់សន្លប់ ដែលជាសញ្ញាគ្រោះថ្នាក់ នៃការរលាកថ្លើមស្រួចស្រាវ៕

ប្រភព៖ Calmette Hospital