កម្មវិធី «រត់ដោយបេះដូង-RUN BY HEART» លើកទី ២ ដែលរៀបចំឡើងដោយតារាចម្រៀង Original Song លោក សាយ ស្ថាបនិក Run With Sai បាន និង កំពុងដំណើរការហើយ ដោយការចុះឈ្មោះរត់ Visual Run នឹងបន្តដល់ថ្ងៃទី ២៥ ខែឧសភា ឆ្នាំ ២០២៥ ខាងមុខនេះ។
ក្នុងនោះដែរ ការរត់ Visual Run ពីសំណាក់អ្នកចុះឈ្មោះរត់ កម្មវិធី «រត់ដោយបេះដូង-RUN BY HEART» លើកទី ២ ទាំង ២ វិញ្ញាសា រួមមាន វិញ្ញារត់ចម្ងាយ ៦ គីឡូម៉ែត្រ និង ២១ គីឡូម៉ែត្រ បានចាប់ផ្តើមតាំងពីថ្ងៃទី ០១ ខែឧសភា ឆ្នាំ ២០២៥ មកម្ល៉េះ ដោយអ្នកចូលរួមអាចរត់បានគ្រប់ទីកន្លែងទូទាំងពិភពលោក រហូតដល់ថ្ងៃទី ៣១ ខែឧសភា ឆ្នាំ ២០២៥។ ដោយឡែកកម្មវិធីពិសេស រត់ដោយបេះដូងជាមួយកុមារអូទីហ្សឹម នឹងរៀបចំឡើងនៅថ្ងៃទី ១ ខែមិថុនា ឆ្នាំ ២០២៥ នៅពហុកីឡដ្ឋានជាតិអូឡាំពិក។
គួរជម្រាបថា កម្មវិធី «រត់ដោយបេះដូង-RUN BY HEART» បានរៀបចំលើកទី ១ កាលពីឆ្នាំ ២០២៤ ក្នុងឱកាស អបអរសាទរ «ទិវាកុមារអន្តរជាតិ» ដើម្បីប្រមូលថវិកាជួយទៅដល់ សាលាទន្សាយ ដែលជាសាលារៀនមួយមើលថែ និង បង្រៀនដល់កុមារអូទីហ្សឹម ស្ថិតក្នុងទីក្រុងភ្នំពេញ។ នៅក្នុងឆ្នាំ ២០២៥ នេះ ព្រឹត្តិការណ៍ «រត់ដោយបេះដូង-RUN BY HEART» លើកទី ២ នឹងរៀបចំឡើង ក្នុងគោលបំណងរៃអង្គាសថវិកាសប្បុរសធម៌ សម្រាប់អង្គការសាលារៀនទន្សាយក្នុងបេសកកម្មថែទាំ និង បង្ហាត់បង្រៀន ទៅដល់កុមារអូទីហ្សឹម (Autism) និង លើកកម្ពស់ការថែទាំសុខភាពតាមរយៈការរត់ផងដែរ។
ជាការពិត ព្រឹត្តិការណ៍ «រត់ដោយបេះដូង លើកទី ២ ឆ្នាំ២០២៥» នេះ គឺជាកម្មវិធីមួយដ៏សំខាន់សម្រាប់ការចូលរួមចំណែកមួយ នៃការជួយដល់សាលារៀនទន្សាយ ដើម្បីបន្តបេសកម្ម និង ទស្សនវិស័យមួយ នៃការជួយដល់វិស័យអប់រំដល់កុមារអូទីហ្សឹម ដោយបច្ចុប្បន្ន មានកុមារអូទីហ្សឹមសរុមរួមប្រមាណជាជាង ៨០០ នាក់ កំពុងតែទទួលបានការសិក្សា និង មើលថែពីសាលារៀនទន្សាយ ដោយ ជាង ២០០ នាក់ នៅទីក្រុងភ្នំពេញ។
ក្នុងនោះ សាលាទន្សាយ បាននឹងកំពុងធ្វើការជាមួយកុមារពិការភាពបញ្ញា អស់រយ:ពេល ២៧ឆ្នាំ ក្នុងបេសកកម្មជំរុញ ការគោរពសិទ្ធិរបស់កុមារដែលមានពិការភាពបញ្ញា ត្បិតពួកគេទទួលបានសិទ្ធិជាមូលដ្ឋាន ការទទួលបានការអប់រំស្មើគ្នា ជីវិតរស់នៅប្រកបដោយសេចក្តីថ្លៃថ្នូរ ដូចពលរដ្ឋទូទៅ ដោយមិនប្រកាន់ពិការភាពរបស់ពួកគេ។
តស់! ចូលរួមកម្មវិធី «រត់ដោយបេះដូង» ដើម្បីអនាគតកុមារអូទីហ្សឹម។ គ្រប់ជំហានរត់របស់អ្នក ជាជំហានដ៏សំខាន់ឆ្ពោះទៅរកការបង្កើតសហគមន៍មួយដែលកុមារអូទីហ្សឹម គ្រប់រូបទទួលបានការផ្តល់តម្លៃចំពោះពួកគាត់!
