កាលពីវេលាម៉ោង ៨ និង ៤០ នាទីព្រឹកថ្ងៃទី ០៤ ខែមករា ឆ្នាំ ២០២៥ កន្លងទៅ (ពេលវេលាក្នុងតំបន់) មានអគ្គិភ័យមួយបានឆាបឆេះផ្សារ Liguang នៅសង្កាត់ Qiaoxi ក្រុង Zhangjiakou ខេត្ត Hebei ប្រទេសចិន ដោយអគ្គិភ័យនេះដែរបានឆាបឆេះខ្លាំងយ៉ាងសន្ធោសន្ធៅជះផ្សែងខ្មៅខ្មួលខ្មាញ់ឡើងលើអាកាស។
តាមព័ត៌មានបានឱ្យដឹងថា អគ្គិភ័យត្រូវគ្រប់គ្រងបានទាំងស្រុងនៅវេលាម៉ោង ១០ និង ១០ នាទីព្រឹក ប៉ុន្តែទម្រាំអាចយកជនរងគ្រោះចេញបានអស់ ក្រុមសង្គ្រោះត្រូវចំណាយពេលរហូតដល់ម៉ោង ១ រសៀល។ តាមការបញ្ជាក់ពីខាងមន្ត្រីប្រចាំតំបន់បានលើកឡើងថា មនុស្សចំនួន ៨ នាក់បានស្លាប់ និង ១៥ នាក់ផ្សេងទៀតបានរងរបួសត្រូវបានបញ្ជូនទៅសង្គ្រោះនៅឯមន្ទីរពេទ្យ រីឯមូលហេតុបង្កជាការឆាបឆេះនេះដែរខាងអាជ្ញាធរកំពុងតែដាក់ការស៊ើបអង្កេត។
គួរឱ្យដឹងថា ផ្សារកើតហេតុខាងលើមានផ្ទះតូចៗសាងសង់ប្រកៀកគ្នាជាច្រើននៅចន្លោះអគារចំនួនពីរ។ នៅទីនោះដែរមានច្រកចេញចំនួន ២ ប៉ុន្តែច្រកទាំងនោះតូចចង្អៀតខ្លាំងធ្វើឱ្យក្រុមអ្នកពន្លត់អគ្គិភ័យពិបាកក្នុងការពន្លត់ភ្លើង នេះបើតាមការបញ្ជាក់ពីអ្នកនៅកន្លែងកើតហេតុម្នាក់៕
