ថ្មីៗនេះ សារព័ត៌មាន SCMP បានចុះផ្សាយពីរឿងរ៉ាវដ៏គួរឱ្យរំជួលចិត្តមួយរបស់បុរសចំណាស់ជនជាតិជប៉ុនម្នាក់ ដែលតែងតែតូចចិត្តនឹងជីវិតដោយសារតែជីវភាពក្រីក្រ តែចុងក្រោយទើបតែដឹងថាខ្លួនជាកូនមហាសេដ្ឋី ដែលត្រូវគ្រូពេទ្យច្រឡំជាមួយនឹងកូនអ្នកដទៃ។
តាមព័ត៌មានបានឱ្យដឹងថា មានបុរសម្នាក់ដែលជាកូនប្រុសរបស់មហាសេដ្ឋីនៅទីក្រុងត្យូក្យូ កើតការឆ្ងល់មិនអស់ចិត្តថាហេតុអ្វីបានជាបងប្រុសបង្កើតរបស់ខ្លួន មិនមានមុខមាត់ស្រដៀងនឹងឪពុកម្តាយសោះ ទើបបានលួចកន្ទុយបារីរបស់បងប្រុសយកទៅធ្វើ DNA ហើយក៏ឃើញថាតាមពិតគ្មានឈាមជាមួយគ្នាសូម្បីតែបន្តិច។
ក្រោយមក បុរសជាប្អូននេះក៏បានចាប់ផ្តើមស្វែងរកបងប្រុសបង្កើតរបស់ខ្លួន ដោយចាប់ផ្តើមសើរើព័ត៌មាននាឆ្នាំ ១៩៥៣ នៅក្នុងមន្ទីពេទ្យ San-Ikukai ក្នុងទីក្រុងតូក្យូឡើងវិញ។ ចុងក្រោយទើបស៊ើបដឹងថា មានទារក ២ នាក់បានកើតមុនក្រោយគ្នាចំនួន ១៣ នាទី ហើយត្រូវបានគ្រូពេទ្យច្រឡំគ្នា ដែលតាមពិតទាយាទពិតរបស់គ្រួសារមហាសេដ្ឋីគឺជាបុរសក្រីក្រម្នាក់វ័យ ៦០ ឆ្នាំ ធ្វើការបើកឡានដឹកទំនិញយ៉ាងកម្សត់។
ជីវិតរបស់បុរសនេះ ត្រូវបានវាសនាផ្លាស់ប្តូរឱ្យមករស់នៅក្នុងគ្រួសារដែលមានជីវភាពក្រខ្សត់យ៉ាងខ្លាំង ហើយត្រូវឪពុកស្លាប់ចោលតាំងអាយុ ២ ឆ្នាំ។ តាំងពីធំធាត់ឡើងមក ត្រូវខិតខំធ្វើការដើម្បីរកប្រាក់រៀនសូត្រដោយខ្លួនឯងសព្វគ្រប់បែបយ៉ាង ខណៈទាយាទដែលមិនពិត បានរៀនសូត្រខ្ពង់ខ្ពស់ ហើយមានមុខដំណែងជាប្រធានក្រុមហ៊ុនទៀតផង។ យ៉ាងណាមិញ ខាងតុលាការបានកាត់ក្តីឱ្យខាងមន្ទីរពេទ្យសងជំងឺចិត្តទៅកាន់បុរសនោះចំនួនជាង ២៥ ម៉ឺនដុល្លារផងដែរ៕
