ពិតណាស់ ក្រោយពី Miss Universe Cambodia 2024 អ្នកនាង ប្រាសាទ ដាវីន បានបញ្ចប់បេសកម្មតំណាងកម្ពុជាលើឆាកអន្តរជាតិនៃកម្មវិធីដ៏អស្ចារ្យ Miss Universe 2024 យ៉ាងរលូន និង នាំយកលទ្ធផលដ៏ល្អត្រឡប់មកកាន់មាតុភូមិវិញ គេឃើញលើបណ្ដាញសង្គមតាមដានវិស័យបវរកញ្ញាកំពុងរង់ចាំមើលថាស្រីស្អាតរូបណានឹងក្លាយជារាជិនីគ្រងមកុដ MUC បន្តក្នុងឆ្នាំ ២០២៥ ខាងមុខ។
ស្របពេលនេះដែរ ក្រឡេកមើលបណ្ដាញសង្គម គេសង្កេតឃើញមានក្រុមអ្នកគាំទ្រ ក៏ដូចបណ្ដាផេកតាមដានគាំទ្រវិស័យបវរកញ្ញាជាច្រើន បានលើកយករូបភាពស្រីស្អាតដ៏ស័ក្តិសម និង ធ្លាប់មានបំណងចង់ចូលរួមប្រកួតកម្មវិធី MUC កន្លងមកនោះ មកបង្ហោះស្ទង់មតិមហាជនអ្នកគាំទ្រថា ស្រីស្អាតរូបណាដែលស្ថិតក្នុងចិត្តអ្នកគាំទ្រស័ក្តិសមជាម្ចាស់មកុដ MUC 2025 ផងដែរ។
ជាក់ស្ដែង ក្រឡេកទៅមើលហ្វេសប៊ុកផេកគាំទ្រវិស័យបវរកញ្ញាមួយឈ្មោះថា Team Cambodia Pageant ក៏បានកាត់តរូបភាពស្រីស្អាតប៉ុន្មានរូបបង្ហោះ ដើម្បីស្ទង់មតិមហាជនថាម្នាក់ណាដែលអ្នកគាំទ្រពេញចិត្ត និង ចង់ឱ្យក្លាយជា MUC បន្ទាប់។
ក្នុងនោះ អ្វីដែលធ្វើឱ្យមហាជនកំពុងផ្ទុះការចែករំលែក និង បញ្ចេញមតិវែកញែកខ្លាំង ខណៈបានឃើញក្នុងចំណោមស្រីស្អាតប៉ុន្មានរូបនោះ ក៏មានកញ្ញា ដេត ស្រីនាឌ ដែលជាអតីត MPC 2024 ទើបផ្ទុះរឿងរ៉ាវពហិការពីការប្រកួត MPI 2024 កន្លងទៅដែរ ដោយបានធ្វើឱ្យអ្នកគាំទ្រជាច្រើនបង្ហាញមតិជាច្រើន ក្នុងសុំកុំឱ្យលើកនាងយកមកស្ទង់មតិបន្តទៀត៕
