ចុងសប្តាហ៍ជាថ្ងៃឈប់សម្រាក បុគ្គលិកច្រើនតែចង់ចំណាយពេលផ្ទាល់ខ្លួនដើម្បីលម្ហែ ឬ ជួបជុំមនុស្សជាទីស្រលាញ់។ យ៉ាងណាមិញ បើក្រុមហ៊ុនចង់ឱ្យបុគ្គលិកធ្វើការ ឬ ចូលរួមនៅថ្ងៃនោះ អ្នកគ្រប់គ្រងគួរតែមានយុទ្ធសាស្ត្រ ដើម្បីឱ្យពួកគេមានអារម្មណ៍វិជ្ជមាន។
តាមរយៈទំព័រហ្វេសប៊ុក ឯកសារច្បាប់ និង រដ្ឋបាល ការតម្រូវឱ្យបុគ្គលិកចូលរួមកម្មវិធីនៅថ្ងៃចុងសប្តាហ៍ អាចជារឿងដែលមានការពិបាកខ្លះ ព្រោះថ្ងៃចុងសប្តាហ៍ គឺជាពេលវេលាសម្រាករបស់ពួកគេ។ ដើម្បីឱ្យការចូលរួមមានភាពរលូន អ្នកគ្រប់គ្រងគួរតែមានការរៀបចំផែនការ និង ការប្រាស្រ័យទាក់ទងល្អជាមួយបុគ្គលិក។
វិធីដោះស្រាយបញ្ហា
១. ពន្យល់ពីមូលហេតុនៃការចូលរួម ៖ អ្នកគ្រប់គ្រងត្រូវពន្យល់ឱ្យបានច្បាស់លាស់ថាតើកម្មវិធីនេះមានសារសំខាន់យ៉ាងណាសម្រាប់ក្រុមហ៊ុន និង សម្រាប់បុគ្គលិកម្នាក់ៗ។ ឧទាហរណ៍ អាចជាកម្មវិធីដើម្បីបង្កើនចំណងមិត្តភាពក្នុងក្រុម ការបណ្ដុះបណ្ដាលជំនាញ ឬ ដើម្បីជួបអតិថិជនសំខាន់ៗ។
២. ផ្ដល់សំណងដែលសមរម្យ ៖ ក្នុងករណីខ្លះ ការតម្រូវឱ្យបុគ្គលិកធ្វើការនៅថ្ងៃចុងសប្ដាហ៍ គួរតែមានសំណងជាថវិកាបន្ថែម ថ្ងៃឈប់សម្រាកជំនួស ឬ ការផ្ដល់អាហារ និង ភេសជ្ជនៅក្នុងកម្មវិធីនោះ។ ការផ្ដល់សំណងនេះបង្ហាញពីការឱ្យតម្លៃរបស់ក្រុមហ៊ុនចំពោះការលះបង់របស់បុគ្គលិក។
៣. រៀបចំផែនការកម្មវិធីឱ្យបានល្អ ៖ កម្មវិធីដែលរៀបចំគួរតែខ្លីល្មម និង មានប្រយោជន៍ពិតប្រាកដ។ ត្រូវជៀសវាងការធ្វើកម្មវិធី ដែលវែងឆ្ងាយដោយគ្មានគោលដៅច្បាស់លាស់ ព្រោះវានឹងធ្វើឱ្យបុគ្គលិកមានអារម្មណ៍ថាពួកគេត្រូវបានបង្ខិតបង្ខំដោយគ្មានប្រយោជន៍។
៤. ទទួលយកការបដិសេធដោយការយោគយល់ ៖ ក្នុងករណីដែលបុគ្គលិកខ្លះមិនអាចចូលរួមបានដោយសារបញ្ហាផ្ទាល់ខ្លួន អ្នកគ្រប់គ្រងគួរយល់ពីស្ថានភាពរបស់ពួកគេ។ ការបង្ខំឱ្យចូលរួមអាចធ្វើឱ្យបុគ្គលិកមានការខឹងសម្បា និង ប៉ះពាល់ដល់ការងារនៅថ្ងៃក្រោយ។
ការប្រាស្រ័យទាក់ទងដោយតម្លាភាព និង ការយល់ចិត្តគ្នាទៅវិញទៅមក គឺជាគន្លឹះដ៏សំខាន់ក្នុងការដោះស្រាយបញ្ហានេះ៕
