ជឿជាក់ថា កាលពីរាត្រីថ្ងៃឆ្លងឆ្នាំកន្លងទៅ បងប្អូនបានទស្សនាកាំជ្រួចស្អាតៗអស្ចារ្យជាច្រើននៅតាមខេត្តក្រុងមួយចំនួននៅកម្ពុជា ដែលបានបញ្ចេញពន្លឺចម្រុះពណ៌លើផ្ទៃមេឃ ក្នុងថ្ងៃឆ្លងឆ្នាំ ខណៈប្រិយមិត្តមួយចំនួនពុំធ្លាប់បានដឹងនោះឡើយថានៅពីក្រោយការអុជកាំជ្រួចនោះគេធ្វើឡើងដោយរបៀបណា។
ជាក់ស្ដែងថ្មីៗនេះ បន្ទាប់ពីកម្មវិធីថ្ងៃឆ្លងឆ្នាំកន្លងផុតទៅ តាមរយៈគណនីដែលមានឈ្មោះ Vayuk វ៉ាយុក ដែលជាអ្នកលក់កាំជ្រួច និង អុជកាំជ្រួច បានបង្ហោះវីដេអូបង្ហាញពីសកម្មភាព ក៏ដូចជារបៀបក្នុងការអុជកាំជ្រួចជាដើម ដែលយើងសង្កេតឃើញថាអាចប្រឈមនឹងគ្រោះថ្នាក់ផងដែរ ដើម្បីផ្ដល់នូវទស្សនីយភាពទៅកាន់មហាជនក្នុងឱកាសថ្ងៃបុណ្យទាននានាជាដើម។
ជាក់ស្ដែង តាមរយៈវីដេអូប្រមាណ ៤ នាទី ដែលបង្ហោះដោយគណនីខាងលើ បានបង្ហាញពីសកម្មភាពខួងដីដាក់បំពង់រៀបចំកាំជ្រួចចូល ពិសេសនោះគឺបច្ចេកទេសនៃការអុជកាំជ្រួចម្ដងមួយតែម្ដង ដែលធ្វើឱ្យអ្នកទស្សនាវីដេអូសកម្មភាពនេះ មិនហ៊ានដកដង្ហើមជំនួស។ សូមបញ្ជាក់ផងដែរថា សកម្មភាពនៃការអុជកាំជ្រួចនេះ ធ្វើឡើងនៅក្នុងភូមិសាស្ត្រខេត្តកំពង់ស្ពឺ ក្នុងឱកាសបុណ្យឆ្លងឆ្នាំសកលឈានចូលឆ្នាំ ២០២៥ នេះ៕
