គិតមកទល់ពេលនេះ គឺជាងមួយសប្ដាហ៍ហើយដែលនាង Fatima Bosch គ្រងមកុដ Miss Universe ឆ្នាំ ២០២៥។ ថ្មីៗនេះដែរ នាង Fatima ក៏បានចុះបេសកកម្មដំបូងក្នុងនាមជាម្ចាស់មកុដទៅកាន់សហរដ្ឋអាមេរិក ដោយនៅទីនោះ នាងក៏បានធ្វើបទសម្ភាសមួយជាមួយទូរទស្សន៍ Telemundo។
ក្នុងកិច្ចសម្ភាសនោះ នៅពេលពិធីករសួរនាងថាធ្លាប់គិតចង់បោះបង់តំណែងចោលទេ? នាង Fatima ក៏បានឆ្លើយតបវិញភ្លាមៗថា៖ «ប្រាកដជាអត់ហើយ ព្រោះខ្ញុំស័ក្ដិសមនឹងទទួលបានមកុដនេះ។ គ្រប់គ្នានិយាយពីរឿងនេះច្រើនដងហើយ តែខ្ញុំនៅតែនិយាយដដែលៗថា ខ្ញុំបានព្យាយាមអស់ពីសមត្ថភាពរបស់ខ្ញុំដូចទៅនឹងបេក្ខភាពដទៃដែរ។ ពួកយើងឆ្លងកាត់ការប្រកួតប្រជែងក្នុងកម្មវិធីនេះ ហើយខ្ញុំជាអ្នកឈ្នះ។ ហេតុអីខ្ញុំត្រូវបោះបង់ចោលនូវអ្វីដែលខ្ញុំព្យាយាមអស់ពីសមត្ថភាពទម្រាំបានបែបនេះ?»។
Fatima Bosch បានបន្ថែមទៀតថា៖ «យើងមិនត្រូវបោះបង់ចោលនោះឡើយ ព្រោះថាយើងខិតខំប្រឹងប្រែង ដាក់កាយដាក់បេះដូងដើម្បីបានវា។ វាពិតជាអយុត្តិធម៌ណាស់សម្រាប់ខ្ញុំ។ ការពិតនៅតែជាការពិត យើងមិនចាំបាច់និយាយការពារខ្លួនអ្វីទៀតឡើយ។ យ៉ាងណា ការនិយាយរបស់យើងក៏សំខាន់ណាស់ដែរ។ ខ្ញុំអាចបញ្ជាក់ថា គ្រប់យ៉ាងដែលគេនិយាយអំពីខ្ញុំគឺជារឿងមិនពិតនោះទេ»។
ជាមួយគ្នានោះដែរ Miss Universe 2025 រូបនេះ ក៏បានឆ្លើយតបជុំវិញចចាមអារ៉ាមថា ឪពុករបស់នាងមានមុខជំនួញជាមួយម្ចាស់ MU ទើបនាងអាចឈ្នះមកុដ។ នាងបានសើចហើយនិយាយថា៖ «ខ្ញុំសើចខ្លាំងពេលនិយាយពីចចាមអារ៉ាមនេះ មានព័ត៌មានមិនពិតជាច្រើនចេញផ្សាយតាមប្រព័ន្ធផ្សព្វផ្សាយនានា ពួកគេនិយាយកុហកម្ដងហើយម្ដងទៀតរហូតទៅជារឿងហ្នឹងដូចជារឿងពិតទៅហើយ។ ជាមួយប្រព័ន្ធផ្សព្វផ្សាយ យើងត្រូវចាំថា កិត្តិនាម និង អំណាច ត្រូវតែមកជាមួយការប្តេជ្ញាចិត្តក្នុងសង្គម ហើយសំខាន់ជាងនេះ គឺទំនួលខុសត្រូវលើការចែករំលែកតែរឿងដែលពិត»៕
