ខណៈទឹកទន្លេចៅផ្រះយ៉ាកំពុងឡើងខ្លាំង នៅយប់រំលងអធ្រាត្រឈានចូលថ្ងៃទី ១៣ ខែវិច្ឆិកា ឆ្នាំ ២០២៥ នេះ ទីក្រុងបាងកកបានទទួលភ្លៀងមួយមេធំថែមទៀត ដែលបណ្តាលឱ្យមានការជន់លិចផ្លូវជាច្រើនខ្សែ បង្កការលំបាកដល់ប្រជាជនយ៉ាងខ្លាំង។
តាមព័ត៌មានបានឱ្យដឹងថា ភ្លៀងមួយមេបានចាប់ផ្តើមធ្លាក់យ៉ាងខ្លាំងចាប់ពីម៉ោង ១ អធ្រាត្រ ឈានចូលថ្ងៃទី ១៣ ខែវិច្ឆិកា ឆ្នាំ ២០២៥ រហូតដល់ព្រឹកម៉ោង ៤ និង ៣០ នាទីទៀបភ្លឺ។ ភ្លៀងមួយមេនេះបានដាក់សម្ពាធថែមមួយកម្រិតទៀតទៅលើប្រព័ន្ធលូនៅក្នុងទីក្រុងបាងកក ហើយបានបង្កទៅជាការជន់លិចផ្លូវជាច្រើនខ្សែនៅក្នុងទីក្រុងបាងកក ដែលមានដូចជាផ្លូវ Ratchada Huai Khwang Phahon Yothin Lat Phrao និង Inthamara ។
ប្រជាជនជាច្រើនបានប្រទះការលំបាក ដោយពិបាកក្នុងការធ្វើដំណើរ និងមានអ្នកខ្លះក៏បានខូចឡានខូចម៉ូតូតាមផ្លួវមិនតិចនោះទេ។ យ៉ាងណាមិញ មកទល់ពេលនេះ ទីក្រុងបាងកកមិនត្រឹមតែត្រូវវាយប្រហារដោយសារតែទឹកភ្លៀងមួយមុខនោះទេ ពោលគឺទឹកទន្លេចៅផ្រះយ៉ាចាប់ផ្តើមទប់លែងជាប់ និងបានហូរចូលមកជាបណ្តើរៗហើយ៕
ប្រភព៖ Kapook
