គួរឱ្យសរសើរ! បញ្ចប់ការសិក្សាពីសិង្ហបុរី ស្ត្រីខ្មែររូបនេះ បើកដេគ័រផ្កាកម្មវិធីលំដាប់ខ្ពស់ ភ្ញៀវត្រូវចិត្តសុទ្ធតែអភិជន

និយាយដល់ ឡឺ ខូធួរ ដេគ័រ អ្នកដែលនិយមតាមដានការរចនាម៉ូដ និង ដេគ័រផ្កានៅក្នុងកម្មវិធីធំៗ ជាពិសេសមង្គលការអភិជន ប្រាកដជាស្គាល់ច្បាស់ ដោយហេតុសេវាកម្មពីក្រុមហ៊ុននេះ តែងបង្កើតភាពភ្ញាក់ផ្អើលជាមួយការដេគ័រទ្រង់ទ្រាយធំ មានលក្ខណៈប្រណីត សំខាន់ ជំនាញលាយបញ្ចូលគ្នារវាងម៉ូដបុរាណ និង សម័យទំនើប មើលមកអស្ចារ្យបំផុត។ នៅពីក្រោយអាជីវកម្មដ៏ធំមួយនេះ ពិតមែនទៅ វាបានកើតឡើងពីស្ថាបនិកស្ត្រីវ័យក្មេងមួយរូប ដែលមានវ័យទើបតែ ៣២ ឆ្នាំ ប៉ុណ្ណោះ នោះគឺ Vanlyda Kong។​

បច្ចុប្បន្ន Vanlyda Kong គឺជានាយកប្រតិបត្តិ និង ជាស្ថាបនិកនៃ La Couture Wedding Decoration ដែលជាក្រុមហ៊ុនដេគ័រសម្រាប់កម្មវិធីប្រណីតលំដាប់ខ្ពស់នៅទីក្រុងភ្នំពេញ។ ជាមួយសញ្ញាបត្របរិញ្ញាបត្រផ្នែករចនាខាងក្នុង (Interior Design) ពីមហាវិទ្យាល័យសិល្បៈ LASALLE នៅប្រទេសសិង្ហបុរី នាងបានរួមបញ្ចូលនូវចំណង់ចំណូលចិត្តចំពោះការរចនា និង សហគ្រិនភាព ដើម្បីបង្កើតពិធីមង្គលការ ដែលមិនអាចបំភ្លេចបាន។

តាមរយៈជំនួញមួយនេះ Vanlyda នាងដឹកនាំអ្នកច្នៃប្រឌិតវ័យក្មេង និង សហការជាមួយសិប្បករក្នុងស្រុក ដើម្បីថែរក្សាសិប្បកម្មខ្មែរ ខណៈពង្រីកវត្តមានម៉ាកយីហោរបស់នាងទៅក្នុងទីផ្សារពិធីមង្គលប្រណីតនៅកម្ពុជា។

ដឹកនាំជំនួញប្រកបដោយភាពលេចធ្លោ ថ្មីៗនេះ Vanlyda Kong ត្រូវបានទស្សនាវដ្តីអន្តរជាតិដ៏ល្បី Prestige ជ្រើសរើសនាងជាបុគ្គលមួយរូប ក្នុងចំណោមបុគ្គល ៤០ នាក់ អាយុក្រោម ៤០ ឆ្នាំ នៅក្នុងកម្មវិធី Prestige 40 under 40 2025 ដែលបង្ហាញពីបុគ្គលមានសមត្ថភាពខ្ពស់ ស្នាដៃល្អនៅក្នុងអាជីព និង មានឥទ្ធិពលទាំងក្នុងប្រទេស និង បណ្តាប្រទេសមួយចំនួននៅក្នុងតំបន់អាស៊ី៕

ប្រភព៖ Prestige