តាមរយៈព្រះរាជក្រឹត្យ អ្នកឧកញ៉ា ផែ ហុកឈួន ត្រូវបានព្រះមហាក្សត្រនៃព្រះរាជាណាចក្រកម្ពុជា ត្រាស់បង្គាប់ផ្តល់គោរមងារ «អ្នកឧកញ៉ា» កាលពីថ្ងៃទី ២៦ ខែវិច្ឆិកា ឆ្នាំ ២០២២។
បើតាមគេហទំព័រ សមាគមឧកញ៉ាកម្ពុជា អ្នកឧកញ៉ា ផែ ហុកឈួន កើតក្នុងឆ្នាំ ១៩៥៣ នៅក្រុងភ្នំពេញ និង ជាអ្នកជំនួញមួយរូប ដែលមានកេរ្តិ៍ឈ្មោះល្បីល្បាញអស់រយៈកាលជាច្រើនទសវត្សរ៍មកហើយ។ បច្ចុប្បន្ន អ្នកឧកញ៉ា ក៏មានតួនាទីជាអនុប្រធានសមាគមឧកញ៉ាកម្ពុជាផងដែរ។
អ្នកឧកញ៉ា ផែ ហុកឈួន គឺជាស្ថាបនិក និង ជាប្រធានក្រុមប្រឹក្សាភិបាល ក្រុមហ៊ុន យី តាក់ គ្រុប (Ye Tak Group LTD) ដែលជាក្រុមហ៊ុននាំចូល និង ចែកចាយជីរកសិកម្មដ៏ធំមួយនៅកម្ពុជាតាំងពីឆ្នាំ ២០០២ ដោយបានសហការជាមួយក្រុមហ៊ុនក្នុងផ្សារភាគហ៊ុនដ៏ធំមួយរបស់ប្រទេសវៀតណាម។
អ្នកឧកញ៉ា ក៏ជាប្រធានក្រុមប្រឹក្សាភិបាលរបស់ក្រុមហ៊ុន ឡុងមេត អេហ្គ្រីខាល់ឈឺ ឯ.ក (Longmate Agriculture Co., LTD) ដែលបានបោះទុនវិនិយោគលើវិស័យកសិកម្ម ជាពិសេសការដាំចេកអំបូងលឿងក្នុងទឹកដីខេត្តកំពត សម្រាប់នាំចេញទៅទីផ្សារបរទេស។
បន្ថែមពីលើនេះ អ្នកឧកញ៉ា ក៏បានវិនិយោគលើវិស័យបដិសណ្ឋារកិច្ច និង ម្ហូបអាហារដូចជា សណ្ឋាគារអាស៊ី (Asia Hotel), សណ្ឋាគារ និង ភោជនីយដ្ឋានប្រេស៊ីដង់ (Le President Hotel and Restaurant), ភោជនីយដ្ឋានកូបេ (Kobe Restaurant) នៅក្នុងទីក្រុងភ្នំពេញ និង អាជីវកម្មដទៃទៀតនៅក្នុងខេត្តសៀមរាបផងដែរ។
ក្រៅពីកិច្ចការជំនួញ និង វិនិយោគ អ្នកឧកញ៉ា ក៏បានលះបង់ជាច្រើនទាំងពេលវេលា និង ថវិកាផ្ទាល់ខ្លួនចូលរួមចំណែកក្នុងការបរិច្ចាគ ទាំងកិច្ចការសង្គម និង សកម្មភាពមនុស្សធម៌ជាច្រើន។ អ្នកឧកញ៉ាត្រូវបានទទួលស្គាល់ពីរាជរដ្ឋាភិបាលកម្ពុជាតាមរយៈការផ្តល់ជូននូវគ្រឿងឥស្សរិយយសជាច្រើន ជាពិសេសគ្រឿងឥស្សរិយយសថ្នាក់កំពូល «ជាតូបការ» ដែលប្រោសព្រះរាជទានដោយព្រះមហាក្សត្រ នៃព្រះរាជាណាចក្រកម្ពុជាផងដែរ៕
