កាលពីថ្ងៃយប់ថ្ងៃទី ២០ ខែសីហា ឆ្នាំ ២០២៥ កន្លងទៅនេះ នៅឯប្រទេសថៃ មានករណីបំផ្ទុះគ្រាប់បែកជាថ្មីនៅក្នុងខេត្តណារ៉ាធីវ៉ាត់ ដែលនៅជាប់ព្រំដែនប្រទេសម៉ាឡេស៊ី បង្កឱ្យទីស្នាក់ការប៉ូលិសខូចខាតខ្ទេច ហើយមានប៉ូលិស ៣ នាក់បានរងរបួស។
តាមព័ត៌មានបានឱ្យដឹងថា ហេតុការណ៍បានកើតឡើងនៅក្នុងភូមិលេខ១ ភូមិខុកម៉ាហ្វឿង ឃុំសាលាម៉ៃ ស្រុកតាកបៃ ខេត្តណារ៉ាធីវ៉ាត់។ ក្នុងនោះ ជនបង្កបើករថយន្តមួយគ្រឿងដែលមានបង្កប់គ្រាប់បែក មកបុកនៅទីស្នាក់ការប៉ូលិស ហើយជនបង្កក៏ហក់ចេញគេចខ្លួនបាត់។ ដោយឡែក រថយន្តខាងលើក៏បានផ្ទុះយ៉ាងខ្លាំង ដែលបង្កឱ្យខូចខាតទៅដល់ទីស្នាក់ការ ហើយមានប៉ូលិសដល់ទៅ ៣ នាក់ ដែលបានរងរបួស។
យ៉ាងណាមិញ ប៉ូលិសដែលរងរបួសត្រូវបានគេបញ្ជូនទៅសង្រ្គោះនៅមន្ទីរពេទ្យ ចំណែកឯជនដៃដល់ត្រូវបានគេដឹងថាមានគ្នាប្រហែលជា ២ នាក់ ហើយពេលនេះខាងអាជ្ញាធរកំពុងតែធ្វើការស្រាវជ្រាវចាប់ជនទាំង ២ នាក់មកដាក់ទោសទៅតាមផ្លូវច្បាប់៕
ប្រភព៖ Khaosod
