ជាការពិតណាស់ ចូលដល់ខែភ្លៀង ធាតុអាកាសនឹងមានភ្លៀងធ្លាក់ញឹកញាប់ ហើយពេលដែលមានភ្លៀងនោះដែរ ក៏អាចបង្កជាគ្រោះធម្មជាតិកាចសាហាវមួយចំនួនផងដែរដូចជា គ្រោះទឹកជំនន់ គ្រោះបំណាក់ដី ឬ បាតុភូតរន្ទះបាញ់ ជាដើម។
ថ្ងៃនេះ «ប្រជាប្រិយ» នឹងធ្វើការបកស្រាយពន្យល់ពីមូលហេតុបង្កឱ្យមានបាតុភូតរន្ទះ៖
បាតុភូតរន្ទះ គឺជាបាតុភូតធម្មជាតិមួយដែលធ្វើឱ្យមនុស្សមានការភ័យខ្លាចមិនចង់ប្រទះ។ តើបាតុភូតនេះកកើតឡើងដោយរបៀបម៉េច? តាមការបកស្រាយពីវិបសាយ National Geographic បាតុភូតរន្ទះ គឺកកើតឡើងដោយសារតែភាពមិនស្មើគ្នារវាងបន្ទុកអគ្គិសនីរវាងពពក និង ផ្ទៃដី ពពក និង ពពក ឬ ពីផ្ទៃដីទៅពពក។
នៅលើមេឃ គឺមានបន្ទុកអគ្គិសនីអវិជ្ជមាន (-) ច្រើន ខណៈផ្ទៃដីខាងក្រោមសម្បូរទៅដោយបន្ទុកវិជ្ជមាន (+) ជាពិសេសនៅតាមអង់តែនទូរស័ព្ទ អគារ ដើមឈើ និង សូម្បីមនុស្ស ជាដើម។ នៅលើមេឃពេលមានភ្លៀងធ្លាក់ មានព្រិលធ្លាក់ ឬ ទឹកកកធ្លាក់ នោះនៅពេលពពួកគ្រាប់ភ្លៀង គ្រាប់ព្រិលទាំងនោះកកិតគ្នាទៅមកក៏បង្កើតឱ្យមានជាបន្ទុកអគ្គិសនី។
បន្ទុកអគ្គិសនីវិជ្ជមាន និង អវិជ្ជមានគឺទាញរកគ្នា ដូច្នេះហើយទើបបណ្ដាលឱ្យមានបាតុភូតរន្ទះកើតមានឡើង៕
