ខាងស្រីខូចក្រលៀន ខាងប្រុសកើតមហារីក រៀបការព្រោះសម្លឹងឃើញក្រលៀនគេ តែចុងក្រោយកើតរឿងស្មានមិនដល់

មានរឿងរ៉ាវដ៏គួរឱ្យរំជួលចិត្តមួយបានកើតឡើងនៅប្រទេសចិន ដោយមាននារីម្នាក់កើតជំងឺខូចក្រលៀន សម្រេចចិត្តទៅរៀបការជាមួយបុរសកើតជំងឺមហារីកដំណាក់កាលចុងក្រោយ សង្ឃឹមបានក្រលៀនគេយកមកប្តូរនឹងខ្លួនឯង តែចុងក្រោយលង់ស្រឡាញ់គ្នាមែនទែន ក្លាយជាស្នេហាដ៏មានន័យ។

តាមព័ត៌មានបានឱ្យដឹងថា នារីខាងលើនេះមានឈ្មោះថា Wang Xiao វ័យ ២៤ ឆ្នាំ​ ជាអកុសលនាងបានកើតជំងឺខូចក្រលៀន (uremia) ទាំងនៅវ័យក្មេង ហើយមានជីវិតរស់បានតែ ១ ឆ្នាំប៉ុណ្ណោះ បើសិនជាមិនបានប្តូរក្រលៀនទាន់ពេលវេលា។ ក្នុងនោះ ក្រុមគ្រួសារនាងគ្មាននរណាដាច់ចិត្តបរិច្ចាគឱ្យនាងឡើយ ទើបនាងនឹកឃើញទៅប្រកាសរកបុរសម្នាក់កើតមហារីកដំណាក់កាលចុងក្រោយ ដើម្បីរៀបការជាមួយគ្នា ដោយសន្យាថានឹងមើលថែគេឱ្យបានល្អ ថ្នូរនឹងការសុំក្រលៀន ក្រោយពីពេលដែលគេស្លាប់ទៅ។

ជាសំណាងល្អ នាងក៏បានជួបនឹងបុរសម្នាក់ឈ្មោះ Yu Zhenping អាយុ ២៧ ឆ្នាំ ជាអ្នកលាប់ជំងឺមហារីកឡើងវិញ ហើយថែមទាំងមានប្រភេទឈាមដូចនាងដែរ។ នាង និង Yu បានចុះអេតាស៊ីវិលជាមួយគ្នាស្ងាត់ៗក្នុងឆ្នាំ ២០១៣ ដោយមានលក្ខខណ្ឌបរិច្ចាគក្រលៀនពី Yu បន្ទាប់ពីគេស្លាប់ទៅ។ ក្នុងអំឡុងពេលរស់នៅជាមួយគ្នា នាងបានមើលថែ ដិតដល់ណាស់ ដោយបានព្យាយាមលក់ផ្កាដើម្បីយកប្រាក់មកព្យាបាលគេទៀត។ លុះមកដល់ឆ្នាំ ២០១៤ អាការៈជំងឺរបស់ Yu ហាក់ដូចជាកាន់តែប្រសើរឡើង ហើយជំងឺរបស់នាងក៏ប្រសើរឡើងដូចគ្នា ដោយមិនចាំបាច់លាងឈាមច្រើនដងដូចកាលពីមុនឡើយ។

ចុងក្រោយ ទាំងគូក៏សម្រេចចិត្តកាន់ដៃគ្នាជាគូស្វាមីភរិយាពិត ដោយលែងគិតពីលក្ខខណ្ឌបរិច្ចាគក្រលៀនតទៅទៀត៕

ប្រភព៖ SCMP