បើគិតមកដល់ពេលនេះ រយៈពេលប្រមាណ ៣ ខែ មកហើយ ដែលតារាចម្រៀងរ៉េប KingChi បានប្រកាសពីសុខទុក្ខជំងឺរបស់ភរិយា ដែលត្រូវលាងឈាមជាប្រចាំ និង ត្រូវវះកាត់ប្តូរក្រលៀនផងនោះ។
ក្រោយពីទទួលបានដំណឹងនេះហើយ គេបានឃើញមហាជន អ្នកគាំទ្រ និង មិត្តសិល្បករជាច្រើន បានចូលរួមជាចំណែកមួយជួយសម្រួលដល់ KingChi ក្នុងការព្យាបាលភរិយា តាមរយៈការជូនជាថវិកាដល់លោកផងដែរ។ លើសពីនោះ ក៏មានសិល្បករមួយចំនួនបានរៀបចំកម្មវិធីប្រគំតន្ត្រីលក់សំបុត្រប្រមូលថវិកាជូនដល់ KingChi ដើម្បីព្យាបាលភរិយាទៀតផង។
ដោយឡែក ក្រោយពីបានព្យាបាលជំងឺ ដោយការលាងឈាមបានមួយរយៈ នៅថ្ងៃទី ០៤ ខែសីហា ឆ្នាំ ២០២៥ នេះ អ្នកនាង ម៉ាណូឡែន ភរិយាតារាចម្រៀងរ៉េប KingChi បានជម្រាបដំណឹងល្អរបស់ខ្លួនដល់មហាជនថា អ្នកនាងនឹងធ្វើដំណើរទៅកាន់ប្រទេសឥណ្ឌា នៅថ្ងៃទី ០៥ ខែសីហា នេះហើយ។
ក្នុងនោះ អ្នកនាង ម៉ាណូឡែន ភរិយាតារាចម្រៀងរ៉េប KingChi បានរៀបរាប់ថា៖ «ពេលវេលា ដែលខ្ញុំរង់ចាំបានមកដល់ហើយ ទីបំផុតខ្ញុំមានឱកាសទៅព្យាបាលជំងឺខូចតម្រងនោមហើយ! ខ្ញុំសូមអរគុណអ្នកទាំងអស់គ្នា ដែលបានជួយខ្ញុំកន្លងមក (ជាថវិកា) និង ពាក្យពេចន៍ជូនពរខ្ញុំផងដែរ។ ឥលូវនេះជីវិតខ្ញុំមានសង្ឃឹមឡើងវិញហើយ។ ពួកយើងនឹងឡើងទៅប្រទេសឥណ្ឌានៅថ្ងៃស្អែក»៕
