មហាជនអ្នកគាំទ្រលើបណ្ដាញសង្គមច្បាស់ជាបានចាប់អារម្មណ៍ហើយ ជុំវិញរឿងរ៉ាវផ្ទុះការវែកញែករិះគន់ម្ដងហើយម្ដងទៀត លើកូនប្រុសទី ២ របស់កំពូលតារាចម្រៀងឧកញ៉ា ព្រាប សុវត្ថិ គឺលោក សុវត្ថិ មុនីនាគ ដែលមានឈ្មោះថ្មីបែបបរទេសហៅថា N.Jonh។
ពិតណាស់ ស្របពេលលោក N.Jonh កំពុងហ្វឹកហាត់ផ្នែកចម្រៀងបរទេសក្នុងស្ថាប័នមួយនៅឯសហរដ្ឋអារិក និង ត្រៀមចេញចម្រៀងថ្មីៗនោះ N.Jonh ក៏ត្រូវបានមហាជនលើបណ្ដាញសង្គមផ្ទុះបញ្ចេញមតិវែកញែក ដោយភាគច្រើនរិះគន់មិនពេញចិត្តខ្លាំង ក្រោយឃើញហ្វេសប៊ុកផេករបស់លោកបញ្ចេញវីដេអូចម្រៀងខ្លីៗ ខុសពេលវេលា ខណៈប្រទេសជាតិកំពុងមានបញ្ហាសង្គ្រាមដោយសារការឈ្លានពានរបស់ថៃ។
ស្របគ្នានោះដែរ ក៏ឃើញមានអ្នកសិល្បៈ ក៏ដូចជាមហាជនអ្នកគាំទ្រមួយចំនួន បានចែករំលែកជាមតិលើកជាហេតុផលមួយឡើង ដើម្បីឱ្យមហាជនជួយយោគយល់ដល់តារាចម្រៀងប្រុសរូបនេះដែរ។
ដោយឡែក មកដល់ថ្ងៃទី ១២ ខែវិច្ឆិកា ឆ្នាំ ២០២៥ កន្លងទៅនេះ ស្របពេលប្រទេសជាតិកំពុងរងការវាយប្រហារជាថ្មីពីយោធាថៃ ស្រាប់តែបានឃើញលើហ្វេសប៊ុកផេករបស់តារាចម្រៀង N.Jonh ក៏បានចេញវីដេអូចម្រៀងថ្មីរបស់លោកចំថ្ងៃតែមួយនេះទៀត ដែលជាហេតុធ្វើឱ្យមហាជនលើបណ្ដាញសង្គមផ្ទុះមតិរិះគន់ខ្លាំងជាថ្មីលើរូបលោក។
ក្រោយឃើញតារាចម្រៀង N.Jonh រងការវែកញែករិះគន់ម្ដងហើយម្ដងទៀតនេះដែរ ក៏បានឃើញហ្វេសប៊ុកផេកឈ្មោះ PSV Family បានបង្ហោះសារឆ្លើយតបទៅកាន់អ្នកវែកញែករិះគន់លើលោក N.Jonh ដោយលើកហេតុផល ៤ ចំណុចជុំវិញស្ថានភាពការងាររបស់តារាចម្រៀងប្រុសរូបនេះ ក្នុងស្ថាប័ននៅសហរដ្ឋអាមេរិកឱ្យមហាជនបានដឹងផងដែរ។
ក្នុងនោះ PSV Family បានបង្ហោះរៀបរាប់ថា ៖ «ចរិត N.John មិនមែនជាមនុស្សឈ្លើយ មិនដឹងខុសត្រូវ ក៏មិនមែនជាមនុស្សបំពុលសង្គម រឹតតែមិនមែនប្រភេទមនុស្សឆ្លៀតឱកាស បាន View ក្នុងពេលប្រទេសមានបញ្ហា។ តែមនុស្សមួយចំនួនតូចទេដែលមិនយល់ពីស្ថានភាពរបស់គាត់ ហើយក៏មិនយល់ហេតុផល ៖
– N.John កំពុងបន្តការសិក្សាផ្នែកសិល្បៈនៅអាមេរិក តើគាត់គួរតែបោះបង់ចោលការងារ និង ការសិក្សា ហើយត្រឡប់មកខ្មែរវិញ ឬយ៉ាងណា?
– N.John មិនមែនជាសិល្បករឯករាជ្យទេ គាត់ម៉េចនឹងអាចលុប អាចផ្លាស់ប្តូរស្រេចតែចិត្តបាន?
– N.John កំពុងនៅក្រោមផលិតកម្មអាមេរិក គ្រប់យ៉ាងត្រូវគោរពតាមការរៀបចំរបស់ផលិតកម្ម ប្រុងឱ្យគាត់លាលែងពីផលិតកម្ម ឬយ៉ាងណា?
– N.John ឆ្លៀតឱកាសពេលមានបញ្ហា? បើអ្នកតាមដានគាត់ទើបដឹង មិនមែនជារឿងចៃដន្យទេ ព្រោះគាត់ផុសសឹងរាល់ថ្ងៃជាធម្មតា តើគាត់ត្រូវផុសគេចរបៀបម៉េចទើបមិនចំថ្ងៃមានបញ្ហា? មនុស្សមួយចំនួនទៅវិញទេដែលចំថ្ងៃមានបញ្ហាទាញ N.John ចូលថាឆ្លៀតឱកាស ថាមានបំណង… អ៊ីចឹងសូមអ្នកទាំងអស់គ្នា សូមចិត្តកុំចាប់កំហុសគ្នាឯងអី»៕
